شينحۋا اگەنتتىگىنىڭ 5 - ايدىڭ 25 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 5 - ايدىڭ 25 - كۇنى بەيجيڭدە بەينە ەكران تاسىلىمەن بىرلەسكەن مەملەكەتتەر ۇيىمىنىڭ ادامدىق ۇقىق ىستەرى جونىندەگى جوعارى دارەجەلى ءمانساپتىسى باچەلەتپەن كەزدەستى.
شي جينپيڭ باچەلەتتىڭ جۇڭگوعا ساپارلاي كەلگەندىگىن قارسى الاتىندىعىن ءبىلدىردى ءارى جۇڭگونىڭ تاريحىمەن جانە مادەنيەتىمەن بىرلەستىرە وتىرىپ، جۇڭگونىڭ ادامدىق ۇقىق ىستەرىنىڭ دامۋىنا ساياتىن كەلەلى ماسەلەلەردى ىشكەرىلەي بايىمداپ، جۇڭگو پارتياسى مەن ۇكىمەتىنىڭ ادامدىق ۇقىقتى جان - جاقتىلى قورعاۋعا جانە قامتاماسىز ەتۋگە كۇش سالعان پرينسيپتىك تۇرعىسىن ايقىن ءبىلدىردى. شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى دۇنيەگە كەلگەن كۇننەن باستاپ، جۇڭگو حالقىن باقىتقا كەنەلتۋدى، جۇڭحۋا ۇلتىنىڭ گۇلدەنۋىن جۇزەگە اسىرۋدى ءوزىنىڭ اۋەلگى ماقساتى جانە بورىشى ساناپ، 100 جىلدان استام ۋاقىتتان بەرى حالىقتىڭ مۇددەسى ءۇشىن تىنباي كۇرەس جۇرگىزىپ كەلەدى. حالىقتىڭ تاماشا تۇرمىسقا دەگەن تالپىنىسى ءبىزدىڭ كۇرەس نىسانامىز. ۇزاق ۋاقىت جاپالى كۇرەس جاساۋ ارقىلى جۇڭگو ءداۋىردىڭ اعىمىنا ۇيلەسەتىن، ءوز مەملەكەت جاعدايىنا ساي كەلەتىن ادامدىق ۇقىقتى دامىتۋ جولىمەن ءساتتى ءجۇردى. ءبىز جالپى بارىستىق حالىق دەموكراتياسىن ۇزدىكسىز دامىتىپ، ادامدىق ۇقىقتى زاڭمەن باسقارۋ ارقىلى قامتاماسىز ەتۋدى ىلگەرىلەتىپ، قوعامدىق ادىلدىك پەن تۋراشىلدىقتى قورعادىق، جۇڭگو حالقى اناعۇرلىم كەڭ، اناعۇرلىم كەمەلدى، اناعۇرلىم جان - جاقتى دەموكراتيالىق ۇقىقتان يگىلىكتەندى. جۇڭگو حالقىنىڭ ادامدىق ۇقىعى بۇرىن بولماعان دەڭگەيدە قامتاماسىز ەتىلدى.
شي جينپيڭ بىلاي دەپ اتاپ كورسەتتى: ادامدىق ۇقىقتى قامتاماسىز ەتۋدىڭ تەك اناعۇرلىم جاقسىسى بولسا بولادى ەكەن، ەڭ جاقسىسى بولۋى مۇمكىن ەمەس. جۇڭگو جاق تەرەزەسى تەڭ بولۋ جانە ءوزارا قۇرمەت ەتۋ نەگىزىندە ءارقايسى جاقپەن بەلسەندى تۇردە ادامدىق ۇقىق كەڭەسىن جانە سەلبەستىگىن ورىستەتۋدى، ورتاق تانىمدى كەڭەيتىپ، الاۋىزدىقتى ازايتىپ، ءوزارا ۇلگى الىپ، بىرگە العا باسىپ، حالىقارالىق ادامدىق ۇقىق ىستەرىن بىرگە ىلگەرىلەتىپ، ءار ەل حالقىنا باقىت جاراتۋدى قالايدى. كەزەكتە، ەڭ ماڭىزدىسى، مىناداي ءتورت ءىستى ويداعىداي ىستەۋ كەرەك:
ءبىرىنشى، حالىقتى وزەك ەتۋگە تاباندى بولۋ. حالىقتىڭ مۇددەسىن شىعار ءتۇيىن جانە تابان تىرەر تياناق ەتىپ، حالىق ەڭ كوڭىل ءبولىپ وتىرعان، ەڭ تىكە، ەڭ رەال مۇددە ماسەلەلەرىن ۇزدىكسىز ويداعىداي شەشىپ، حالىقتىڭ باقىتتى تۇرمىس كەشىرۋى ءۇشىن قۇلشىنۋ كەرەك، مىنە بۇل ەڭ ۇلكەن ادامدىق ۇقىق. ءبىر مەملەكەتتىڭ ادامدىق ۇقىق جاعدايىنىڭ جاقسى - جامان بولۋىندا، باستىسى، سول ەل حالقىنىڭ مۇددەسىنىڭ قورعالعان - قورعالماعاندىعىنا، حالىقتىڭ تابىس سەزىمىنىڭ، باقىت سەزىمىنىڭ، حاۋىپسىزدىك سەزىمىنىڭ ارتقان - ارتپاعاندىعىنا قاراۋ كەرەك، مىنە بۇل ءبىر ەلدىڭ ادامدىق ۇقىق جاعدايىن سارالايتىن ەڭ ماڭىزدى ولشەم. حالىقتى ناعىز قوجايىن بولىپ، ادامدىق ۇقىق ىستەرىن دامىتۋدىڭ نەگىزگى ات سالىسۋشىسىنا، جەبەۋشىسىنە، يگىلىگىن كورۋشىسىنە اينالدىرۋ كەرەك.
ەكىنشى، ءار ەلدىڭ ادامدىق ۇقىعىنىڭ دامۋ جولىنا قۇرمەت ەتۋ. ادامدىق ۇقىق تاريحي، ناقتى، رەال بولادى، ءار ەلدىڭ مەملەكەت جاعدايى ۇقسامايدى، تاريحي مادەنيەتىندە، قوعامدىق تۇزىمىندە، ەكونوميكالىق، قوعامدىق دامۋ دەڭگەيىندە پارىق بولادى، ءسوز جوق ءارى تەك قانا ءوز مەملەكەتىنىڭ ءىس جۇزىندىگىن جانە حالىقتىڭ سۇرانىسىن شىعار ءتۇيىن ەتىپ، وزىنە ۇيلەسەتىن ادامدىق ۇقىقتى دامىتۋ جولى جولىندا ىزدەنىس جاساۋ كەرەك. ءىس جۇزىندىكتەن الشاقتاپ، وزگە ەلدىڭ ءتۇزىم ۇلگىسىن تۇتاستاي كوشىرىپ اكەلۋ ءوز جاعدايىنا ۇيلەسپەي قالۋمەن بىرگە، اۋىر زارداپ تا تۋدىرادى، تۇبىندە زيانعا ۇشىرايتىنى تاعى سول قالىڭ حالىق بۇقاراسى. بۇل جاعىنداعى مىسالدار تولىپ جاتىر، مۇنان عيبىرات - ساباق الۋ كەرەك.
ءۇشىنشى، ءتۇرلى ادامدىق ۇقىقتى ءبىر تۇتاس جوسپارلاپ، تەڭ ءمان بەرۋ. ادامدىق ۇقىقتىڭ ءمانى جان - جاقتىلى، باي مازمۇندى كەلەدى، ءسوز جوق، كەشەندى شارا قولدانىپ، جۇيەلى ىلگەرىلەتۋ كەرەك. وركەندەپ كەلە جاتقان ەلدەر جونىنەن العاندا، ءومىر ءسۇرۋ ۇقىعى، دامۋ ۇقىعى − ماڭداي الدى ادامدىق ۇقىق. اناعۇرلىم جوعارى ساپالى، اناعۇرلىم ءونىمدى، اناعۇرلىم ءادىل، اناعۇرلىم باياندى، اناعۇرلىم حاۋىپسىز دامۋدى قۇلشىنا جۇزەگە اسىرىپ، ادامدىق ۇقىق ىستەرىنىڭ دامۋىنا پارمەندى قامتاماسىزدىق ازىرلەۋ كەرەك.
ءتورتىنشى، الەمدىك ادامدىق ۇقىقتى باسقارۋدى كۇشەيتۋ. ادامدىق ۇقىقتى جەبەۋ جانە قورعاۋ − بۇكىل ادامزاتتىڭ ءىسى، كوپشىلىكتىڭ ورتاق قۇلشىنىس جاساۋىنا مۇقتاج. ادامدىق ۇقىق ماسەلەسىندە مۇلدە ءمىنسىز ”ارمانداعىداي ەل“ جوق، وزگە ەلدەردى ەمەۋرىنىنە باقتىرعىسى كەلەتىن ”اقىلگويلەردىڭ“ قاجەتى جوق، ادامدىق ۇقىق ماسەلەسىن ساياسيلاندىرىپ، قۇرالعا اينالدىرىپ، قوس ولشەم قولدانىپ، ادامدىق ۇقىقتى جەلەۋ ەتىپ، وزگە ەلدىڭ ىشكى ىسىنە كيلىگۋگە استە بولمايدى. بىرلەسكەن مەملەكەتتەر ۇيىمى ۋستاۆىنىڭ باستى ماقساتىنا جانە پرينسيبىنە قاتاڭ بويسۇنىپ، بۇكىل ادامزاتتىڭ ورتاق قۇندىلىعىن اسقاقتاتىپ، الەمدىك ادامدىق ۇقىق ىستەرىن باسقارۋدىڭ اناعۇرلىم ءادىل، تۋراشىل، ۇيلەسىمدى، سيىسىمدى بەتالىسقا قاراي دامۋىن ىلگەرىلەتۋ كەرەك. جۇڭگو جاق بىرلەسكەن مەملەكەتتەر ۇيىمىنىڭ حالىقارالىق ادامدىق ۇقىق ىستەرىن جەبەۋدەگى بەلسەندى قۇلشىنىسىنا جالعاستى قولداۋ كورسەتەدى.
باچەلەت مىنالاردى ءبىلدىردى: جۇڭگو جاقتىڭ ىندەت قيىنشىلىعىن جەڭىپ، مەنىڭ جۇڭگوعا ساپارلاي بارۋىمدى قابىلداعانىنا العىس ايتامىن، بۇل 17 جىلدان بەرگى بىرلەسكەن مەملەكەتتەر ۇيىمىنىڭ ادامدىق ۇقىق ىستەرى جونىندەگى جوعارى دارەجەلى ءمانساپتىسىنىڭ جۇڭگوعا تۇڭعىش رەت ساپارلاي كەلۋى، مەن وسى رەتكى ساپارىما ايرىقشا ءمان بەرەمىن جانە قاستەرلەيمىن، جۇڭگو ۇكىمەتىمەن جانە قوعامنىڭ ءار سالاسىنداعى قايراتكەرلەرمەن كەڭ كولەمدە كەزدەسىپ، تىكەلەي تىلدەسەمىن، وسى رەتكى ساپاردىڭ مەنىڭ جۇڭگونى ءتىپتى دە ويداعىداي تۇسىنۋىمە سەپتىگى تيەتىندىگىنە سەنەمىن. جۇڭگو جاقتىڭ كەدەيلىكتى جويۋ، ادامدىق ۇقىقتى قورعاۋ، ەكونوميكالىق، قوعامدىق دامۋدى جۇزەگە اسىرۋ سياقتى جاقتاردا جاساعان قۇلشىنىسىنا جانە قول جەتكىزگەن ناتيجەسىنە سۇيسىنەمىن، جۇڭگو جاقتىڭ كوپ جاقتىلىقتى قورعاۋ، كليمات وزگەرىسى سياقتى الەمدىك سىن - سايىستارعا توتەپ بەرۋ، الەمنىڭ باياندى دامۋىن جەبەۋ سياقتى جاقتاردا اتقارعان ماڭىزدى رولىن القايمىن. جوعارى دارەجەلى ءمانساپتىلار كەڭسەسى جۇڭگو جاقپەن تىلدەسۋدى كۇشەيتىپ، سەلبەستىكتى تەرەڭدەتىپ، الەمدىك ادامدىق ۇقىق ىستەرىنىڭ العا باسۋىن جەبەۋگە ورتاق قۇلشىنىس جاساۋدى قالايدى.
ديڭ شۋەشياڭ، ياڭ جيەچى، ۋاڭ ي (گۋاڭجوۋدا) كەزدەسۋگە قاتىناستى.
