− بەدەلدى ماماندار جاقىننان بەرگى ىندەتتىڭ ءجيى تۋىلۋ ماسەلەسىنە جاۋاپ بەردى
□ شينحۋا اگەنتتىگىنىڭ تىلشىلەرى دۇڭ رۇيفىڭ، گۋ تيانچىڭ
3 - ايعا قادام تاستاعالى ەلىمىزدە ىندەتتىڭ تۋىلۋ جيىلىگى ايتارلىقتاي كوبەيىپ، شارپۋ كولەمى ۇزدىكسىز كەڭەيىپ، قازىرگە دەيىن 28 ولكەگە جايىلىپ ۇلگىردى.
جۇعىمدالعاندار سانى نە ءۇشىن شاپشاڭ ارتتى؟ ساقتانۋ - تىزگىندەۋ شارالارىن قايتكەندە قاتاڭ، جەدەل تياناقتاندىرۋعا بولادى؟ مەملەكەتتىك دەنساۋلىق ساقتاۋ جانە سالاماتتىق كوميتەتى اۋرۋدىڭ الدىن الۋ جانە ونى تىزگىندەۋ مەكەمەسىنىڭ ورىنباسار باستىعى لەي جىڭلۇڭ، جۇڭگو اۋرۋدىڭ الدىن الۋ جانە ونى تىزگىندەۋ ورتالىعى ەپيدەميولوگيالىق باس مامانى ۋ زۇنيوۋ شينحۋا اگەنتتىگى تىلشىلەرىنىڭ سۇحباتىن قابىلداپ، قولامتالى ماسەلەلەرگە جاۋاپ بەردى.
جاقىننان بەرى ىندەت نە ءۇشىن ءجيى تۋىلۋدا؟ ”ۆيرۋستىڭ جاڭا شتاممى بىزدەن ارەكەت ەتۋ جىلدامدىعىمىزدى ونان ارى جوعارىلاتۋدى تالاپ ەتەدى“
ءتىلشى: ەل ىشىندەگى ىندەتتىڭ ەڭ جاڭا احۋالى قانداي؟
لەي جىڭلۇڭ: جاڭا تيپتى ايدارشا ۆيرۋس وكپە قابىنۋ ىندەتى كەڭ تارالۋىنىڭ الەمدىك 4 - تولقىنىنىڭ ىقپالىندا، اسىرەسە، ەلىمىز توڭىرەگىندەگى مەملەكەتتەر مەن وڭىرلەردەگى ىندەت جاعدايى دەڭگەيىنىڭ جەدەل كوتەرىلۋىنە بايلانىستى، وعان قوسا باستى تارالىپ جاتقان اۋميكروننىڭ وزگەرگەن شتاممىنىڭ تارالۋ جىلدامدىعى اناعۇرلىم تەز، جاسىرىنعىشتىق سيپاتى اناعۇرلىم كۇشتى بولعاندىقتان، تاياۋدان بەرى ەلىمىزدە ىندەتتىڭ شەتەلدەن كىرۋ قىسىمى ۇزدىكسىز ارتىپ، ءوز جەرىمىزدەگى توپتالۋ سيپاتىنداعى ىندەت جاعدايىندا تارالۋ ءتۇيىنى كوپ، اۋقىمى كەڭ بولۋ، ءجيى تۋىلۋ ەرەكشەلىگى كورىنىس بەردى.
قازىر جيلين، شاندۇڭ، شاڭحاي، گۋاڭدۇڭ سياقتى جەرلەردەگى ىندەت ءالى دامۋ ۇستىندە، ءبىر ءبولىم وڭىرلەردە ىندەت جاعدايىنىڭ ورلەۋ جىلدامدىعى ءبىرشاما شاپشاڭ بولۋدا، لياۋنيڭ، سىچۋان، حۋبەي، جياڭسۋ سياقتى جەرلەردەگى ىندەت ءونىمدى تىزگىندەلدى، ىشكى موڭعۇلداعى ىندەت جاعدايى اياقتاۋ كەزەڭىندە تۇر.
ماماندار جالپىلاي زەرتتەپ، تۇجىرىمداي كەلە بىلاي دەپ قارادى: ەلىمىزدە قازىر اتقارىلىپ وتىرعان ”يكەمدى تۇردە نولگە ءتۇسىرۋ“ جالپى باعىتى مەن ءبىرسىپىرا ساقتانۋ - تىزگىندەۋ شارالارى اۋميكروننىڭ وزگەرگەن شتاممىنان تۋىنداعان ىندەت ءۇشىن جارامدى، ءونىمدى، ءبىراق اۋميكروننىڭ وزگەرگەن شتاممىنىڭ تارالۋ جىلدامدىعى اناعۇرلىم تەز، جاسىرىنعىشتىق سيپاتى اناعۇرلىم كۇشتى بولۋ ەرەكشەلىگى بىزدەن ساقتانۋ - تىزگىندەۋ شارالارىنىڭ اناعۇرلىم ەرتە، اناعۇرلىم شاپشاڭ، اناعۇرلىم قاتاڭ، اناعۇرلىم ناقتى بولۋىن تالاپ ەتەدى.
ۋ زۇنيوۋ: جاڭا تيپتى ايدارشا ۆيرۋس وكپە قابىنۋ ىندەتى كەڭ تارالۋىنىڭ الەمدىك 4 - تولقىنى، باستىسى، اۋميكرون ۆيرۋس شتاممىنان تۋىنداپ وتىر، قازىر ەلىمىزدە باستى تارالىپ جاتقانى 2.BA سۋب - ۆاريانتى. اۋميكرون ۆيرۋس شتاممىنىڭ جۇعىمدالۋ مولشەرى دەلتا شتاممىنان دا كۇشتى، زەرتتەۋلەردە كورسەتىلۋىنشە، اۋميكرون ۆيرۋس شتاممى 1.BAدىڭ تارالۋ جىلدامدىعى دەلتا شتاممىنان ％77 تەز بولسا، 2.BAنىڭ تارالۋ جىلدامدىعى 1.BAدەن ％66 تەز بولادى ەكەن.
ياعني قازىرگى ۆيرۋس شتاممىنىڭ تارالۋ جىلدامدىعى ءبىز 2021 - جىلى، 2020 - جىلى جولىققان ۆيرۋس شتاممداردىڭ تارالۋ جىلدامدىعىنان ايتارلىقتاي تەزدەگەن. ەگەر بۇرىنعىداي ارەكەت ەتۋ جىلدامدىعى بويىنشا بولسا، ىندەتتەن ساقتانۋ - تىزگىندەۋ قاجەتىنە ىلەسە الماي قالامىز، سوندىقتان بۇل بىزدەن ارەكەت ەتۋ شاپشاڭدىعىن ونان ارى جوعارىلاتۋدى تالاپ ەتەدى.
قوعامدىق جاقتا قاشان ”نولگە ءتۇسىرۋدى“ جۇزەگە اسىرامىز؟ ”ىندەتكە توتەپ بەرۋ جانە ونى ءبىر جاقتى ەتۋ قىزمەتى ءتارتىپتى، پارمەندى ىلگەرىلەتىلۋدە“
ءتىلشى: باسقارۋشى تاراۋلار قازىر ىندەتتەن ساقتانۋ - تىزگىندەۋدىڭ قانداي قىزمەتتەرىن ورىستەتىپ جاتىر؟ ءبىز قىسقا ۋاقىت ىشىندە وسى كەزەكتى ىندەتتى تىزگىندەي الامىز با؟
لەي جىڭلۇڭ: پارتيا ورتالىق كوميتەتى، مەملەكەتتىك كەڭەس جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتىنە ايرىقشا ءمان بەرىپ وتىر. مەملەكەتتىك كەڭەستىڭ بىرلەسىپ ساقتانۋ، بىرلەسىپ تىزگىندەۋ مەحانيزمىنىڭ جالپىلىق گرۋپپاسى مەملەكەتتىڭ قىزمەت گرۋپپالارىن ىشكى موڭعۇل، يۇننان، لياۋنيڭ، جيلين، حيلۇڭجياڭ، شاندۇڭ، گۋاڭدۇڭ قاتارلى ولكەلەرگە بارىپ ىندەتتى ءبىر جاقتى ەتۋ قىزمەتىنە جەتەكشىلىك ەتۋگە، جەرگىلىكتى ورىندارمەن بىرلەسىپ ىندەت جاعدايىنا بىرگە تالداۋ، تۇجىرىم جاساپ، ىندەتتەن ساقتانۋ - تىزگىندەۋ شارالارىن اقىلداسۋعا، ءار كۇنى باقىلاۋ - تەكسەرۋ جۇرگىزىپ، ماسەلەلەر مەن ۇسىنىستاردى دەر كەزىندە العا قويىپ، جەرگىلىكتى ورىنداردى رەتتەۋ - تۇزەتۋدى تياناقتاندىرۋعا قۋزاۋعا اتتاندىردى.
جالپىلاي ايتقاندا، قازىر ىندەت تۋىلعان جەرلەردە ىندەتكە توتەپ بەرۋ جانە ونى ءبىر جاقتى ەتۋ قىزمەتى ءتارتىپتى، پارمەندى ىلگەرىلەتىلۋدە، ءبىر ءبولىم جەرلەردە جاقسارۋ بەتالىسى جارىققا شىعىپ ۇلگىردى. ءبىز ىندەت تۋىلعان جەرلەردىڭ ىندەتتى ءبىر جاقتى ەتۋ تالابىن ەگجەي - تەگجەيلى، ناقتى تياناقتاندىرۋىنا، حىسۋان ەكشەپ تەكسەرۋ جانە قاتەرلى ادامداردى اداقتاپ تەكسەرۋدى، باسقارۋ - تىزگىندەۋدى جەدەلدەتۋىنە، ”تەكسەرىلۋگە تيىستىلەرىن قالدىرماي تەكسەرىپ“، ”اۋاشالانۋعا تيىستىلەرىن قالدىرماي اۋاشالاپ“، ”ەمدەلۋگە تيىستىلەرىن قالدىرماي ەمدەپ“، ”باسقارۋعا تيىستىلەرىن قالدىرماي باسقارۋىنا“، قوعامدىق جاقتا ”نولگە ءتۇسىرۋدى“ جەدەل جۇزەگە اسىرۋىنا ۇزدىكسىز تۇردە جەتەكشىلىك ەتەمىز.
ۋ زۇنيوۋ: اۋميكرون ۆيرۋس شتاممىنىڭ وزىندىك جاڭا ەرەكشەلىكتەرى بار، ونىڭ ۇستىنە ەلىمىزدە ءبىرتالاي سالىستىرماداعى جۇرتشىلىق قاۋىم ۆاكسينا ەكتىرگەندىكتەن، ءبىرشاما كوپ جۇعىمدالۋشىلاردا اۋرۋ بەلگىسى بولماي نەمەسە ولار اۋرۋ بەلگىسىن سەزبەي، قوعامدا اۋەلگىدەي قيمىل جاساپ، ىندەتتىڭ اناعۇرلىم كەڭ كولەمدە جايىلۋىنا مۇرىندىق بولۋدا. بۇل ءبىز وسى كەزەكتى ىندەتتە ءدوپ كەلگەن اسا زور سىناق سانالادى.
ايتسە دە ىندەتتەن ساقتانۋ - تىزگىندەۋدىڭ قيىندىعى باسقا ۆيرۋس شتاممدارعا قاراعاندا ءبىراز جوعارىراق بولعانىمەن، ”سىرتتان كىرۋدەن ساقتانۋ، ىشتە بەلەڭ بەرۋدەن ساقتانۋ“ جالپى تاكتيكاسىنان، ”يكەمدى تۇردە نولگە ءتۇسىرۋ“ جالپى باعىتىنان جازباي، ساقتانۋ - تىزگىندەۋ شارالارىن اناعۇرلىم تەز، اناعۇرلىم ءدال، اناعۇرلىم ەگجەي - تەگجەيلى ىستەسەك بولعانى، ءبىز قىسقا ۋاقىت ىشىندە ىندەتتى ءبىرشاما تار كولەمدە تىزگىندەي الامىز.
كەلەسى قادامداعى ءتۇيىندى قىزمەت قايسىلار؟ ”ساقتانۋ - تىزگىندەۋدى ۇدايىلاندىرۋدى ۇزدىكسىز كۇشەيتۋ“
ءتىلشى: كەلەسى قادامداعى ىندەتتەن ساقتانۋ - تىزگىندەۋدەگى ءتۇيىندى قىزمەت قايسىلار؟
لەي جىڭلۇڭ: كەلەسى قادامدا ساقتانۋ - تىزگىندەۋدى ۇدايىلاندىرۋدى ۇزدىكسىز كۇشەيتۋ كەرەك. ءبىرىنشى، شەكارا وتكەلدەرى مەن شەكارا وڭىرلەرىندەگى ساقتانۋ - تىزگىندەۋدى قاتايتىپ، ادام، زات، قورشاعان ورتادان بىردەي ساقتانۋعا تاباندى بولىپ، ادامداردى جابىق اينالىمدا باسقارۋدى كورنەكتىلەندىرۋ كەرەك.
ەكىنشى، ءتۇيىندى الاڭ - ورىندارداعى ساقتانۋ - تىزگىندەۋدى ۇدايىلاندىرۋدى كۇشەيتىپ، مەكتەپ، قارتتار ءۇيى سياقتى ادامدار تىعىز الاڭ - ورىندار مەن مەكەمەلەردى جاۋاپكەرشىلىكتى ناقتىلاۋعا، كۇندەلىكتى قاداعالاۋ مەن ساقتانۋ - تىزگىندەۋ تالاپتارىن كۇشەيتۋگە قۋزاۋ كەرەك.
ءۇشىنشى، مەديتسينالىق قۇرىلىمدار سياقتىلاردىڭ ”قاراۋىل ءتۇيىنى“ رولىن ساۋلەلەندىرىپ، الدىن الا تەكسەرۋ، ءبولىپ دياگنوز قويۋ جانە العاشقى دياگنوزدا جاۋاپتى بولۋ ءتۇزىمىن قاتاڭ تياناقتاندىرىپ، ءدارىحانا، ەمحانا، وقۋ - اعارتۋ قۇرىلىمى، اۋىل شارۋاشىلىق ونىمدەرى بازارى سياقتى الاڭ - ورىندارداعى قىزمەت وتەۋشى ادامداردىڭ دەنساۋلىعىن قاداعالاۋدى كۇشەيتىپ، كوپ تۇيىندە ىسكە قوسىلاتىن الدىن الا ساقتاندىرۋ مەحانيزمىن كەمەلدەندىرۋ كەرەك. ”انتيگەنىن ەكشەپ تەكسەرۋ، حىسۋان بويىنشا دياگنوز قويۋ“ سىندى قاداعالاۋ ۇلگىسىن جالپىلاستىرىپ، بايقاۋدىڭ دەر كەزىندە بولۋىن جوعارىلاتۋ كەرەك.
ۋ زۇنيوۋ: بولاشاقتا ىندەتتىڭ الەمدىك 4 - تولقىنىنىڭ باسەڭدەۋىنە، سونداي - اق توڭىرەگىمىزدەگى ەلدەر مەن وڭىرلەردەگى ىندەتتىڭ بىرتىندەپ تىزگىندەلۋىنە مەڭزەس، سىرتتان كىرۋدەن ساقتانۋدىڭ قىسىمى دا جەڭىلدەيدى دەپ مەجەلەۋگە بولادى. ءبىراق ءبىزدىڭ بۇكىلدەي وسىلاي بولادى دەپ ۇمىتتەنىپ وتىرا بەرۋىمىزگە بولمايدى، تاعى دا سول، ءوز جاعدايىمىزدى تياناق ەتىپ، ساقتانۋ - تىزگىندەۋ شارالارىن تىڭعىلىقتى تياناقتاندىرۋىمىز كەرەك.
”يكەمدى تۇردە نولگە تۇسىرۋدە“ دەر كەزىندە بايقاۋ، دەر كەزىندە ءۇزۋ، دەر كەزىندە ەمدەۋ بارىنەن ماڭىزدى. ەگەر وسى 3 باستى جاقتىڭ بارىندە ەرتە، ءدال، شاپشاڭ بولۋدى ورىنداي الساق، ساقتانۋ - تىزگىندەۋ شارالارى سەرپىنىنىڭ ارتۋىنا مەڭزەس، وسى كەزەكتى ىندەتتىڭ ءبىرشاما تەز، ءونىمدى تىزگىندەلەتىنىنە سەنەمىز.
