شينحۋا اگەنتتىگىنىڭ 3 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 16 - كۇنى تۇستەن كەيىن يندونەزيانىڭ زۇڭتۇڭى جوكومەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جۇڭگو دا، يندونەزيا دا وركەندەپ كەلە جاتقان ءىرى ەلدەردىڭ جانە جاڭادان وركەندەگەن ەكونوميكالىق تۇلعالاردىڭ ۋاكىلى، دۇنيە جۇزىندەگى 100 جىلدىق وزگەرىس پەن عاسىرلىق ىندەت الدىندا، ەكى ەل قول ۇستاسا العا ىلگەرىلەپ، قيىندىقتى ەڭسەرە العا ۇمتىلىپ، ەكى جاقتى قارىم - قاتىناستىڭ ساياسي، ەكونوميكا، گۋمانيتارلىق، تەڭىزدەگى سەلبەستىك سىندى ”4 جەتەكتى“ جاڭا ارناسىن قالىپتاستىرىپ، ىندەتكە ىنتىماقتاسا قارسى اتتانۋدىڭ جانە بىرگە دامۋدىڭ نەگىزگى اۋەنىن اسقاقتاتىپ، جۇڭگو - يندونەزيا تاعدىرلاس ورتاق تۇلعاسىن بىرگە قۇرۋ سىندى جالپى باعداردى ايقىنداپ، وركەندەپ كەلە جاتقان ءىرى ەلدەردىڭ شىن پەيىلمەن سەلبەسۋىنىڭ ۇلگىسىن ورناتتى. جۇڭگو جاق يندونەزيامەن ءجيى پىكىرلەسۋدى ساقتاپ، جۇڭگو − يندونەزيا دوستىق سەلبەستىگىنىڭ ۇزدىكسىز تىڭ دامۋعا قول جەتكىزۋىن ىلگەرىلەتىپ، وڭىرلىك جانە الەمدىك دامۋدىڭ كەلەلى جاعدايىنا اناعۇرلىم كوپ تۇراقتىلىق جانە وڭ ەنەرگيا ۇستەۋدى قالايدى.
شي جينپيڭ بىلاي دەپ باسا دارىپتەدى: ەكى جاق ءبىزدىڭ جاڭا تيپتى ايدارشا ۆيرۋس ۆاكسينا سەلبەستىگى سياقتىلاردا قول جەتكىزگەن ورتاق تانىمدارىمىزدى ويداعىداي تياناقتاندىرىپ، ىندەتكە قارسى اتتانۋ سەلبەستىگىن ۇزدىكسىز كۇشەيتۋ كەرەك. جاكارتا − باندۇڭ جوعارى جىلدامدىقتى تەمىر جولىنىڭ مەجەلى مەرزىمدە سالىنىپ بولىپ پويەز قاتىناۋىنا شىنايى كەپىلدىك ەتىپ، ”وڭىرلىك كەشەندى ەكونوميكالىق ءدالىز“، ”ەكى ەلدىڭ قوس باقشاسى“ سياقتى ءتۇيىندى نىسانداردى ويداعىداي تياناقتاندىرىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، يندونەزيانىڭ دامۋى مەن ەكى ەلدىڭ سەلبەستىگىنە ۇدەمەلى جىلدامدىق ۇستەۋ كەرەك. يندونەزيانىڭ دامۋىنا ءتيىمدى، ەكى ەلدىڭ سەلبەستىگىنە پايدالى نىسان بولسا بولعانى، جۇڭگو جاق تۇگەلدەي بەلسەندى پوزيتسيا ۇستانادى. ەكى جاق الەمدىك بازاردىڭ تۇراقتىلىعى مەن قامداۋ تىزبەگىنىڭ ىركىلىسسىزدىگىن قورعاپ، الەمدىك دامۋ باستاماسىنىڭ تياناقتانۋىن، ناقتىلانۋىن ىلگەرىلەتىپ، شىعىس وڭتۇستىك ازيا ەلدەرى وداعىن وزەك ەتكەن، اشىق، سيىسىمدى وڭىرلىك جۇلگەنى باتىل قورعاپ، ىنتىماق پەن سەلبەستىككە، ءوزارا پايدا جەتكىزىپ، قاتار يگىلىكتەنۋگە تاباندى بولۋ كەرەك. جۇڭگو جاق يندونەزيانىڭ 20 ەل توبىنا ءتوراعا ەل رولىن ساۋلەلەندىرىپ، نازاردى ”بىرگە قايتا جاندانۋ، تەبىنمەن قايتا جاندانۋ“ تاقىرىبىنا شوعىرلاندىرىپ، بالي ارالى باسشىلار ءماجىلىسىن ويداعىداي وتكىزۋىنە قولداۋ كورسەتەدى.
جوكو مىنالاردى ءبىلدىردى: جۇڭگونىڭ مەملەكەتتىك ەكى ءماجىلىسىنىڭ ءساتتى جابىلعاندىعىن قۇتتىقتايمىن، بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ تولىق تابىستى بولعاندىعىن قۇتتىقتايمىن. قازىر يندونەزيا مەن جۇڭگونىڭ ەكى جاقتى ساۋدا، قارجى قوسۋ سەلبەستىگى قاۋىرت ارتۋدا. يندونەزيا جۇڭگو جاقپەن بىرگە جاكارتا − باندۇڭ جوعارى جىلدامدىقتى تەمىر جولىن مەجەلى مەرزىمدە سالىپ بولىپ، ەكى ەل حالقىن باقىتقا كەنەلتۋدى قالايدى. يندونەزيا جۇڭگو جاقپەن ءۇشىنشى تاراپ سەلبەستىگىن ورىستەتىپ، يندونەزيانىڭ جاڭا استانا قۇرىلىسىنا دەم بەرۋىن ءۇمىت ەتەدى. جۇڭگو جاقتىڭ يندونەزيانىڭ ”وڭىرلىك كەشەندى ەكونوميكالىق ءدالىز“ قۇرىلىسىنا جانە جاسىل ونەركاسىپ باقشاسى قۇرىلىسىنا ۇزدىكسىز قولداۋ كورسەتۋىن ءۇمىت ەتەدى. ءتوراعا شي جينپيڭ العا قويعان الەمدىك دامۋ باستاماسى بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن جۇزەگە اسىرۋعا دەم بەرەدى، يندونەزيا بۇعان بار كۇشپەن قولداۋ كورسەتەدى، جۇڭگو جاقپەن ءجيى پىكىرلەسىپ، باستامانىڭ تياناقتانۋىن ىلگەرىلەتىپ، دۇنيە ءجۇزىنىڭ بىرگە دامۋىن جەبەۋ ءۇشىن ۇلەس قوسۋدى قالايدى. يندونەزيا جۇڭگو جاقپەن ءجيى پىكىرلەسىپ، سايكەسىپ، 20 ەل توبى قىزمەتىن ىلگەرىلەتۋدە نازاردى ەكونوميكانىڭ قايتا جاندانۋىنا جانە الەمدىك دامۋعا شوعىرلاندىرىپ، كوكەي تەستى الەمدىك ماسەلەلەردى كۇش بىرىكتىرە شەشۋدى قالايدى.
ەكى جاق ۋكراينا جاعدايى جونىندە پىكىر الماستىرىپ، ءار جاق تاتۋلىققا شاقىرىپ، كەلىسسوز وتكىزۋدى جەبەۋگە تاباندى بولۋى، كەڭ كولەمدى ادامگەرشىلىك داعدارىستىڭ تۋىلۋىنىڭ الدىن الۋى، جازالاۋدىڭ دۇنيە ءجۇزى ەكونوميكاسىنا تەرىس ىقپال كورسەتۋىن تىزگىندەۋى، دۇنيە ءجۇزى ەكونوميكاسىنىڭ قايتا جاندانۋ ۇردىسىنە كەسىر تيگىزۋدەن ساقتانۋى كەرەك دەپ قارادى.
شينحۋا اگەنتتىگىنىڭ 3 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 16 - كۇنى تۇستەن كەيىن تۇركمەنستاننىڭ زۇڭتۇڭى بەردىمۇحامەدوۆپەن، سايلانعان زۇڭتۇڭى سەردار بەردىمۇحامەدوۆپەن تەلەفوندا سويلەستى. شي جينپيڭ تۇركمەنستاننىڭ زۇڭتۇڭ سايلاۋىنىڭ ءساتتى وتكىزىلگەندىگىن قۇتتىقتادى، سەردار بەردىمۇحامەدوۆتىڭ تۇركمەنستاننىڭ زۇڭتۇڭى بولىپ سايلانعاندىعىن تاعى ءبىر مارتە قۇتتىقتادى، تۇركمەنستاننىڭ ”قۋاتتى ەل بولۋدىڭ جاڭا داۋىرىندەگى قايتا گۇلدەنۋ“ بارىسىندا تىڭ، اناعۇرلىم كەسەك تابىسقا قول جەتكىزۋىن تىلەدى.
شي جينپيڭ بىلاي دەپ اتاپ كورسەتتى: جاقىنعى جىلداردان بەرى جۇڭگو مەن تۇركمەنستاننىڭ قارىم - قاتىناسى قارىشتاپ دامىپ، ەكى جاق ستراتەگيالىق سەرىكتەستىك قارىم - قاتىناس ورناتتى، ەكى ەلدىڭ ءار سالاداعى سەلبەستىگى تاريحتاعى ەڭ جوعارى دەڭگەيگە جەتتى.
جۇڭگو جاق جۇڭگو − تۇركمەنستان قارىم - قاتىناسىنا ايرىقشا ءمان بەرەدى، تۇركمەنستان جاقتىڭ ءتۇرلى ىشكى - سىرتكى ساياساتتارىنا ۇزدىكسىز تۇردە تاباندى قولداۋ كورسەتەدى، سىرتقى كۇشتەردىڭ تۇركمەنستاننىڭ ىشكى ىسىنە كيلىگۋىنە باتىل قارسى تۇرادى، تۇركمەنستان جاقپەن بىرگە الدىڭعىلاردىڭ ءىزىن باسىپ بولاشاققا جول اشىپ، جۇڭگو − تۇركمەنستان قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، اناعۇرلىم تىعىز جۇڭگو − تۇركمەنستان تاعدىرلاس ورتاق تۇلعاسىن قول ۇستاسا بىرگە قۇرۋدى قالايدى.
شي جينپيڭ بىلاي دەپ باسا دارىپتەدى: جۇڭگو − تۇركمەنستان سەلبەستىگى ەكى جاقتىڭ جوعارى دەڭگەيدەگى ءوزارا سەنىمى مەن شىنايى دوستىعىن تولىق ايگىلەدى. ەكى جاق قول قويعان ۇكىمەت ارالىق 5 جىلدىق سەلبەستىك جوباسى الداعى ءبىر مەزگىلدەگى جۇڭگو مەن تۇركمەنستاننىڭ جان - جاقتى سەلبەستىگى ءۇشىن جول كارتاسىن دايىنداپ، ءتۇيىندى سەلبەستىك سالالار مەن الدىمەن ويلاستىرىلاتىن سەلبەستىك بەتالىسىن ايقىنداپ بەردى. ەكى جاق ەنەرگيا، تابيعي گاز سياقتى ءار سالاداعى سەلبەستىكتەردى ۇزدىكسىز ىلگەرىلەتىپ، ”ءبىر بەلدەۋ، ءبىر جول“ باستاماسىن تۇركمەنستان جاقتىڭ ”جىبەك جولىن قايتا گۇلدەندىرۋ“ ستراتەگياسىمەن ۇشتاستىرۋدى ىلگەرىلەتىپ، ەكى جاقتىڭ ءوزارا پايدالى سەلبەستىگىنىڭ اياسىن بارعان سايىن ۇلعايتىپ، اناعۇرلىم كوپ تىڭ جەتىستىكتەرگە قول جەتكىزىپ، ەكى ەل حالقىنىڭ قۇت - ىرىسىن مولايتۋى كەرەك. قازىر حالىقارالىق جانە وڭىرلىك جاعداي كۇردەلى، سەزىمتال بولىپ تۇر، ەكى جاق ەلەۋلى ماسەلەلەر جونىندە دەر كەزىندە پىكىرلەسىپ، تىعىز سايكەسىپ، ءوزارا قولداۋ كورسەتىپ، ناعىز كوپ جاقتىلىققا تاباندى بولىپ، حالىقارالىق قارىم - قاتىناستىڭ دەموكراتيالانۋىن جانە حالىقارالىق ادىلدىكتى، تۋراشىلدىقتى جەبەۋگە كۇش قوسۋى كەرەك.
بەردىمۇحامەدوۆ پەن سەردار بەردىمۇحامەدوۆ جاقىنعى جىلداردان بەرگى تۇركمەنستان − جۇڭگو قارىم - قاتىناسىنىڭ دامۋىندا قول جەتكەن تابىستاردى جوعارى باعالاپ، تۇركمەنستان جاقتىڭ جۇڭگوعا باعىتتالعان دوستىق سەلبەستىك ساياساتىن ۇزدىكسىز باتىل ۇستاناتىندىعىن، جۇڭگو جاقپەن بىرگە ۇزدىكسىز قۇلشىنىپ، ءار سالاداعى جان - جاقتى ناقتى سەلبەستىكتەردى بەلسەنە ىلگەرىلەتۋدى قالايتىندىعىن، تۇركمەنستان − جۇڭگو قارىم - قاتىناسىنىڭ ونان ارى داميتىندىعىنا، ەكى ەل حالقىن اناعۇرلىم ويداعىداي باقىتقا كەنەلتەتىندىگىنە سەنەتىندىگىن ءبىلدىردى.
