شينحۋا اگەنتتىگىنىڭ 10 - ايدىڭ 13 - كۇنى بەيجيڭنەن بەرگەن حابارى (ءتىلشى ياڭ يجۇن). مەملەكەت ءتوراعاسى شي جينپيڭ 10 - ايدىڭ 13 - كۇنى گەرمانيانىڭ زۇڭليى مەركەلمەن بەينە ەكراندا ديدارلاستى. ەكى جاق دوستىق بەينەدە سوڭعى جىلدارداعى جۇڭگو - گەرمانيا، جۇڭگو - ەۆروپا قارىم - قاتىناسىنىڭ دامۋىنا قايىرىلا قارادى ءارى قاتىستى ماسەلەلەر جونىندە ىشكەرىلەي پىكىر اۋىستىردى.
شي جينپيڭ مەركەلدىڭ مىندەتتەگى كەزىندە جۇڭگو - گەرمانيا، جۇڭگو - ەۆروپا قارىم - قاتىناسىنىڭ دامۋىنا قوسقان ۇلەسىنە بەلسەندى باعا بەردى. شي جينپيڭ بىلاي دەپ اتاپ كورسەتتى: ”ادامداردىڭ ءوزارا تانىستىعىندا ءبىرىن - ءبىرى ءتۇسىنۋ ماڭىزدى؛ ادامداردىڭ ءوزارا تۇسىنىسۋىندە ءبىر - بىرىمەن سىرلاسۋ ماڭىزدى“. بۇل ءسوز ءارى ءبىزدىڭ تالاي جىل ىشكەرىلەي ارالاسۋىمىزدىڭ ەڭ جاقسى تۇسىندىرمەسى، ءارى وتكەن 16 جىلدان بەرى جۇڭگو - گەرمانيا قارىم - قاتىناسىنىڭ ورنىقتى، اقاۋسىز دامۋدى ساقتاۋىنىڭ ماڭىزدى تاجىريبەسى. جۇڭگولىقتار دوستىق سۇيىسپەنشىلىككە، ادامگەرشىلىككە ءمان بەرەدى، ءبىز كونە دوسىمىزدى ۇمىتپايمىز، جۇڭگونىڭ قاقپاسى سىزگە قاشاندا اشىق بولادى. ءسىزدىڭ جۇڭگو - گەرمانيا، جۇڭگو - ەۆروپا قارىم - قاتىناسىنىڭ دامۋىنا ۇزدىكسىز كوڭىل ءبولۋىڭىزدى جانە ونى قولداۋىڭىزدى ءۇمىت ەتەمىز.
شي جينپيڭ بىلاي دەپ باسا دارىپتەدى: ءبىز تالاي رەت ەكى جاقتى قارىم - قاتىناس، كەلەلى حالىقارالىق جانە وڭىرلىك ماسەلەلەر، ەل باسقارۋ تاجىريبەسى سياقتىلار جونىندە ىشكەرىلەي پىكىر اۋىستىرىپ، ەكى جاقتى قارىم - قاتىناستىڭ العا دامۋىن بىرگە ىلگەرىلەتىپ، جۇڭگو مەن گەرمانيانىڭ الەمدىك سىن - سايىستارعا سەلبەسە توتەپ بەرۋىن ىلگەرىلەتتىك. جۇڭگو مەن گەرمانيا ءوزارا پايدا جەتكىزۋ، سەلبەسۋ رۋحى بويىنشا، ەكى ەلدىڭ ەكونوميكادا ءوزارا تولىقتاۋ سيپاتىن ساۋلەلەندىرىپ، تەڭ يگىلىككە كەنەلۋدى جۇزەگە اسىردى. جۇڭگو مەن گەرمانيا وزدەرىن جاقسى دامىتسا، دۇنيە ءجۇزى ەكونوميكاسىنا قوسقان ۇلەسى دە اناعۇرلىم زور بولادى. بۇل مەملەكەت پەن مەملەكەت اراسىندا تەكە تىرەس جاعدايدان بۇكىلدەي ساقتانىپ، ءوزارا تيىمدىلىك جاساپ، تەڭ يگىلىكتەنۋگە بولاتىندىعىن دالەلدەيدى، بۇل جۇڭگو مەن گەرمانيانىڭ قارىم - قاتىناسىندا مىقتى يگەرۋگە ءتيىستى نەگىزگى ارنا. كەلەر جىل جۇڭگو مەن گەرمانيانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، ەكى جاق قارىم - قاتىناسى دامۋىنىڭ قالاي بەت الۋىندا دۇرىس بەتالىستى ساقتاۋ اسا ماڭىزدى. جۇڭگو جاق جۇڭگو - گەرمانيا قارىم - قاتىناسىنا باستان - اياق ستراتەگيالىق بيىكتەن جانە ۇزاق بولاشاقتىق تۇرعىدان قارايدى، گەرمانيا جاقپەن جوعارى جىكتەگىلەردىڭ بارىس - كەلىسىن ساقتاپ، ءوزارا ءتۇسىنىسۋ مەن حالىقتار دوستىعىن ارتتىرىپ، ءداستۇرلى سالالارداعى سەلبەسۋ كومەسكى كۇشىن اشىپ، ەنەرگيانى جاڭالاۋ، جاسىل جانە سيفرلى ەكونوميكا سياقتى ناقتى سەلبەستىكتىڭ جاڭا سالالارىن بەلسەنە اشىپ، جۇڭگو مەن گەرمانيا سەلبەستىگىنىڭ تەرەڭدەۋىن، ناقتىلانۋىن ىلگەرىلەتۋدى قالايدى.
شي جينپيڭ بىلاي دەپ اتاپ كورسەتتى: بەيبىتشىلىك پەن دامۋعا تالپىنۋ جۇڭگو - ەۆروپا ەكى جاقتىڭ ورتاق تىلەگى. جۇڭگو مەن ەۆروپا تۇگەلدەي كوپ جاقتىلىقتى قورعاۋدى قۋاتتايدى، تۇگەلدەي ساۋدا مەن قارجى قوسۋدىڭ ەركىندەسۋىن، قولايلىلاسۋىن قولدايدى، تۇگەلدەي جۇڭگو مەن ەۆروپانىڭ ورتاق مۇددەسى قايشىلىق - الاۋىزدىقتاردان باسىم تۇرادى دەپ قارايدى. قازىر الەمدىك جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ جانە دۇنيە ءجۇزى ەكونوميكاسىنىڭ قالپىنا كەلۋىن ىلگەرىلەتۋ شەشۋشى مەزگىلدە تۇر، كۇن سايىن كوبەيگەن الەمدىك ماسەلەلەر مەن ۇزدىكسىز جوعارىلاعان ورنىقسىزدىق، تۇراقسىزدىق الدىندا، جۇڭگو مەن ەۆروپانىڭ الەمدەگى ەكى ءىرى ماڭىزدى كۇش رەتىندە، سەلبەستىكتى كۇشەيتىپ، ىنتىماقتاسا توتەپ بەرۋ جاۋاپكەرشىلىگى بار. ەكى جاق جۇڭگو - ەۆروپا قارىم - قاتىناسىنا اناعۇرلىم كەڭ ولشەممەن قاراپ، وبيەكتى، جان - جاقتىلى تۇرعىدا ءبىرىن - ءبىرى تانىپ، پارىقتاردى، الاۋىزدىقتاردى ۇستامدى دا سىپايى، سىندارلى تۇردە ءبىر جايلى ەتۋى ءتيىس. ەۆروپا جاقتىڭ دەربەس، ءوز - وزىنە قوجايىن بولۋعا تاباندى بولىپ، ەۆروپا وداعىنىڭ ءوز مۇددەسى مەن حالىقارالىق قوعامنىڭ ىنتىماعىن شىنايى قورعاپ، جۇڭگو جاقپەن جانە باسقا ەلدەرمەن بىرلەسىپ، بەيبىتشىلىك پەن دامۋ سىندى عاسىرلىق قيىن ماسەلەنى شەشۋگە بىرگە كۇش سالۋىن ءۇمىت ەتەمىن.
مەركەل مىنانى ءبىلدىردى: ءبىزدىڭ ونداعان جىلداردان بەرگى ءار رەتكى بارىس - كەلىسىمىز ءالى ەسىمدە. ءبىز ورتاق كوڭىل ءبولىپ وتىرعان ماسەلەلەر جونىندە بۇكپەسىز ىشكەرىلەي پىكىر اۋىستىرىپ، ءوزارا تۇسىنىستىكتى ارتتىرىپ، گەرمانيا - جۇڭگو قارىم - قاتىناسى مەن ەۆروپا - جۇڭگو سەلبەستىگىنىڭ تاماشا دامۋىن جەبەدىك. مەن گەرمانيا زۇڭليى بولعان مەزگىلدە، جۇڭگو جەدەل دامۋدى جۇزەگە اسىردى، مەملەكەت قۋاتى باياعىدان مۇلدە باسقاشا بولدى ءارى وراسان زور كومەسكى كۇشىن ايگىلەدى. مەن ەۆروپا وداعىنىڭ جۇڭگومەن قارىم - قاتىناستى دەربەس، وزىنە - ءوزى قوجايىن بولا وتىرىپ دامىتۋى كەرەكتىگىن باستان - اياق قۋاتتاپ كەلەمىن، ەكى جاقتىڭ ءوزارا ساقتالىپ وتىرعان پارىق جانە الاۋىزدىق ماسەلەلەر جونىندە تىلەسۋدى، پىكىرلەسۋدى كۇشەيتۋىنە بولادى، ەۆروپا - جۇڭگو قارىم - قاتىناسىنىڭ كۇردەلى فاكتورلاردى جەڭىپ، ۇزدىكسىز داميتىندىعىنا سەنەمىن. گەرمانيا جاق جۇڭگو جاقتىڭ كليمات وزگەرىسىنە توتەپ بەرۋ جانە ورگانيزمدەردىڭ الۋان تۇرلىلىگىن قورعاۋ ءۇشىن جاساعان قۇلشىنىستارىن القايدى، جۇڭگو جاقپەن بىرگە گەرمانيا مەن جۇڭگو ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتاۋ قيمىلدارىن بىرگە جاقسىلاپ وتكىزىپ، ەكى جاقتى جانە كوپ جاقتى سەلبەستىكتى ۇزدىكسىز كۇشەيتىپ، الەمدىك سىن - سايىستارعا بىرگە توتەپ بەرۋدى قالايدى. مەن گەرمانيا مەن جۇڭگونىڭ، ەۆروپا مەن جۇڭگونىڭ تۇسىنىستىگى مەن سەلبەستىگىن جەبەۋ ءۇشىن بەلسەندى قۇلشىنىس جاساي بەرەمىن.
ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
