لي جانشۋ ءماجىلىستى باسقاردى
«حالىق گازەتى»، 6 - ايدىڭ 10 – كۇنى، بەيجيڭ (ءتىلشى ۋاڭ بيشۋە). 13 – كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 29 – رەتكى ءماجىلىسى 6 - ايدىڭ 10 - كۇنى تۇستەن كەيىن بەيجيڭدەگى حالىق سارايىندا جابىلدى. ءماجىلىس داۋىسقا سالۋ ارقىلى ساندى مالىمەت حاۋىپسىزدىگى زاڭىن، حاينان ەركىن ساۋدا پورتى زاڭىن، اسكەريلەردىڭ ورنى جانە ۇقىق - مۇددەسىن قامتاماسىزداندىرۋ زاڭىن، جاڭادان وزگەرىس ەنگىزىلگەن اسكەري قۇرىلعىلاردى قورعاۋ زاڭىن، ءوندىرىس حاۋىپسىزدىگى زاڭىنا وزگەرىس ەنگىزۋ جونىندەگى قاۋلىنى، ماركا سالىعى زاڭىن، شەتەلدىڭ جازالاۋىنا قارسى تۇرۋ زاڭىن ماقۇلدادى. مەملەكەت ءتوراعاسى شي جينپيڭ 84 -، 85 -، 86 -، 87 -، 88 -، 89 -، 90 - ءنومىرلى ءتوراعا بۇيرىعىنا جەكە - جەكە قول قويىپ جاريالادى. كوميتەت باستىعى لي جانشۋ ءماجىلىستى باسقاردى.
تۇراقتى كوميتەتتىڭ قۇرامىنداعىلاردان 164 ادام ماجىلىسكە قاتىناستى، ماجىلىسكە قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
ءماجىلىس مەملەكەتتىك حالىق قۇرىلتايى تۇراقتى كوميتەتىنىڭ شاڭحاي قالالىق حالىق قۇرىلتايى مەن ونىڭ تۇراقتى كوميتەتىنە پۋدۇڭ جاڭا رايونىنىڭ زاڭ - ەرەجەلەرىن جاساۋعا ۇقىق بەرۋ جونىندەگى قاۋلىسىن داۋىسقا سالىپ ماقۇلدادى.
ءماجىلىس مەملەكەتتىك حالىق قۇرىلتايى تۇراقتى كوميتەتىنىڭ 2020 جىلعى ورتالىقتىڭ سوڭعى ەسەبىن بەكىتۋ جونىندەگى قاۋلىسىن داۋىسقا سالىپ ماقۇلداپ، 2020 جىلعى ورتالىقتىڭ سوڭعى ەسەبىن بەكىتتى.
ءماجىلىس مەملەكەتتىك حالىق قۇرىلتايى تۇراقتى كوميتەتىنىڭ 8 بەسجىلدىق زاڭمەن جونگە سالۋ ۇگىت تاربيەسىن ورىستەتۋ جونىندەگى قاۋلىسىن داۋىسقا سالىپ ماقۇلدادى.
ءماجىلىس مەملەكەتتىك حالىق قۇرىلتايى تۇراقتى كوميتەتى ۋاكىلدەردىڭ تولىمدىلىعىن تەكسەرۋ كوميسسياسىنىڭ ءىشىنارا ۋاكىلدەردىڭ ۋاكىلدىك تولىمدىلىعى جونىندەگى بايانداماسىن داۋىسقا سالىپ ماقۇلدادى.
ءماجىلىس داۋىسقا سالۋ ارقىلى ۋاڭ گوشىڭدى مەملەكەتتىك حالىق قۇرىلتايى قوعامدىق قۇرىلىس كوميتەتى مەڭگەرۋشىسىنىڭ ورىنباسارلىعىنا تاعايىندادى.
ءماجىلىس تاعى باسقا دا مىندەتكە تاعايىنداۋ، مىندەتىنەن قالدىرۋ جوباسىن داۋىسقا سالىپ ماقۇلدادى.
مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارلارى ۋاڭ چىن، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ۋان ىشياڭ، چىن جۋ، ۋاڭ دۇڭميڭ، بايماچىلين، ديڭ جۇڭلي، حاۋ ميڭجين، ساي دافىڭ، ۋ ۋەيحۋا، باس حاتشى ياڭ جىن ۋ ماجىلىسكە قاتىناستى.
مەملەكەتتىك كەڭەستىڭ مۇشەسى شياۋ جيە ، ەڭ جوعارى حالىق سوتى مەكەمەسىنىڭ باستىعى جوۋ چياڭ، ەڭ جوعارى حالىق پروكۋراتۋراسىنىڭ باس پروكۋرورى جاڭ جۇن، مەملەكەتتىك باقىلاۋ تەكسەرۋ كوميتەتىندەگى جاۋاپتى جولداس، مەملەكەتتىك حالىق قۇرىلتايىنىڭ ارناۋلى كوميتەتتەرىنىڭ مۇشەلەرى، ولكەلىك، اۆتونوميالى رايوندىق، توتە قاراستى قالالىق حالىق قۇرىلتايى تۇراقتى كوميتەتتەرىندەگى جاۋاپتى جولداستار، مەملەكەتتىك حالىق قۇرىلتايىنىڭ ءىشىنارا ۋاكىلدەرى، قاتىستى تاراۋلارداعى جاۋاپتى جولداستار، ت. ب. ماجىلىسكە سىرتتاي قاتىناستى.
ءماجىلىستىڭ جابىلۋ سالتىنان كەيىن 13 - كەزەكتى مەملەكەتتىك حالىق قۇرىلتايىنىڭ تۇراقتى كوميتەتى 24 - رەتكى ارناۋلى تاقىرىپتاعى لەكسياسىن وتكىزدى، كوميتەت باستىعى لي جانشۋ باسقاردى. مەملەكەتتىك حالىق قۇرىلتايى تۇراقتى كوميتەتى باس حاتشىسىنىڭ ورىنباسارى شين چۇنيىڭ «جۇڭگو كوممۋنيستىك پارتياسى جانە ەلىمىزدىڭ ءتۇبىرلى ساياسي ءتۇزىمى» دەگەن تاقىرىپتا لەكسيا جاسادى.
