لي جانشۋ ءماجىلىستى باسقاردى
«حالىق گازەتى»، 4 - ايدىڭ 29 - كۇنى، بەيجيڭ. 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 28 - ءماجىلىسى 4 - ايدىڭ 29 - كۇنى تۇستەن بۇرىن بەيجيڭدەگى حالىق سارايىندا جابىلدى. ءماجىلىس داۋىسقا سالۋ ارقىلى اۋىل - قىستاقتى كوركەيتۋدى جەبەۋ زاڭىن، ازىق - تۇلىك ىسىراپشىلدىعىنا قارسى تۇرۋ زاڭىن، جاڭادان وزگەرىس ەنگىزىلگەن تەڭىز قاتىناسى حاۋىپسىزدىگى زاڭىن، مەملەكەتتىك حالىق قۇرىلتايى تۇراقتى كوميتەتىنىڭ وقۋ - اعارتۋ زاڭىنا وزگەرىس ەنگىزۋ جونىندەگى قاۋلىسىن، جول قاتىناس حاۋىپسىزدىگى زاڭى سياقتى 8 زاڭعا وزگەرىس ەنگىزۋ جونىندەگى قاۋلىسىن، جۇڭگو حالىق ازاتتىق ارمياسىنىڭ مەملەكەتتىك حالىق قۇرىلتايى مەن اۋدان دارەجەلىدەن جوعارى جەرگىلىكتى ءار دارەجەلى حالىق قۇرىلتايلارىنىڭ ۋاكىلدەرىن سايلاۋ ادىسىنە وزگەرىس ەنگىزۋ جونىندەگى قاۋلىسىن ماقۇلداپ، حۋاڭ ميڭدى شۇعىل جاعدايعا توتەپ بەرۋدى باسقارۋ مينيسترلىگىنىڭ مينيسترى ەتىپ تاعايىنداۋدى ۇيعاردى. مەملەكەت ءتوراعاسى شي جينپيڭ 77 -، 78 -، 79 -، 80 -، 81 -، 82 -، 83 - ءنومىرلى ءتوراعا بۇيرىقتارىنا جەكە - جەكە قول قويدى. كوميتەت باستىعى لي جانشۋ ءماجىلىستى باسقاردى.
تۇراقتى كوميتەتتىڭ قۇرامىنداعى 168 ادام ماجىلىسكە قاتىناستى، ماجىلىسكە قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
ءماجىلىس جاڭادان وزگەرىس ەنگىزىلگەن مەملەكەتتىك حالىق قۇرىلتايى تۇراقتى كوميتەتىنىڭ ورتالىقتىڭ مەجە ەسەبىن تەكسەرۋدى، باقىلاۋدى كۇشەيتۋ جونىندەگى قاۋلىسىن داۋىسقا سالىپ ماقۇلدادى، مەملەكەتتىك حالىق قۇرىلتايى تۇراقتى كوميتەتىنىڭ مەملەكەتتىك كەڭەستىڭ ەركىن ساۋدا سىناق رايونىندا قاتىستى زاڭدىق بەلگىلەمەلەردى ۋاقىتشا رەتتەۋىنە، قولدانۋىنا ۇقىق بەرۋ جونىندەگى قاۋلىسىن داۋىسقا سالىپ ماقۇلدادى.
ءماجىلىس مەملەكەتتىك حالىق قۇرىلتايى تۇراقتى كوميتەتىنىڭ «<شاڭحاي ىنتىماقتاستىق ۇيىمىنا مۇشە ەلدەردىڭ بىرلەسكەن اسكەري مانەۆەر وتكىزۋ جونىندەگى كەلىسىمىنىڭ> تولىقتاما كەلىسىمىن» بەكىتۋ جونىندەگى قارارىن، «جۇڭحۋا حالىق رەسپۋبليكاسى مەن يران ءىسلام رەسپۋبليكاسىنىڭ قىلمىستىق ىستەرگە ءادىليالىق كومەك بەرۋ شارتىن» بەكىتۋ جونىندەگى قارارىن، «جۇڭحۋا حالىق رەسپۋبليكاسى مەن يران ءىسلام رەسپۋبليكاسىنىڭ ازاماتتىق ىستەر جانە ساۋدا ىستەرى جونىندەگى ءادىليالىق كومەك شارتىن» بەكىتۋ جونىندەگى قارارىن، «شارشى كيلومەتر اۋماقتارداعى استرونوميا ستانسياسىن قۇرۋ شارتىن» بەكىتۋ جونىندەگى قارارىن داۋىسقا سالىپ ماقۇلدادى.
ءماجىلىس مەملەكەتتىك حالىق قۇرىلتايى تۇراقتى كوميتەتى ۋاكىلدەردىڭ تولىمدىلىعىن تەكسەرۋ كوميسسياسىنىڭ ءىشىنارا ۋاكىلدەردىڭ ۋاكىلدىك تولىمدىلىعى جونىندەگى بايانداماسىن داۋىسقا سالىپ ماقۇلدادى.
ءماجىلىس داۋىسقا سالۋ ارقىلى لين دونى مەملەكەتتىك حالىق قۇرىلتايى مۇھاجىرلار كوميتەتى مەڭگەرۋشىسىنىڭ ورىنباسارلىعىنا تاعايىندادى؛ جياڭ حۇڭجۇندى جۇڭگو حالىق ازاتتىق ارمياسى اسكەري پروكۋراتۋراسىنىڭ باس پروكۋرورى مىندەتىنەن قالدىردى، چىڭ دۇڭفاڭدى جۇڭگو حالىق ازاتتىق ارمياسى اسكەري پروكۋراتۋراسىنىڭ باس پروكۋرورلىعىنا تاعايىندادى.
ءماجىلىس تاعى باسقا دا مىندەتكە تاعايىنداۋ، مىندەتىنەن قالدىرۋ جوباسىن داۋىسقا سالىپ ماقۇلدادى.
مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارلارى ۋاڭ چىن، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ىشياڭ، چىن جۋ، ۋاڭ دۇڭميڭ، بايماچىلين، ديڭ جۇڭلي، حاۋ ميڭجين، ساي دافىڭ، ۋ ۋەيحۋا، باس حاتشى ياڭ جىن - ۋ ماجىلىسكە قاتىناستى.
مەملەكەتتىك باقىلاۋ - تەكسەرۋ كوميتەتىنىڭ مەڭگەرۋشىسى ياڭ شياۋدۋ، مەملەكەتتىك كەڭەستىڭ مۇشەسى ۋاڭ ي، ەڭ جوعارى حالىق سوتى مەكەمەسىنىڭ باستىعى جوۋ چياڭ، ەڭ جوعارى حالىق پروكۋراتۋراسىنىڭ باس پروكۋرورى جاڭ جۇن، مەملەكەتتىك حالىق قۇرىلتايى ارناۋلى كوميتەتتەرىنىڭ مۇشەلەرى، ولكەلىك، اۆتونوميالى رايوندىق، توتە قاراستى قالالىق حالىق قۇرىلتايى تۇراقتى كوميتەتتەرىنىڭ جاۋاپتىلارى، مەملەكەتتىك حالىق قۇرىلتايىنىڭ ءىشىنارا ۋاكىلدەرى، قاتىستى تاراۋلارداعى جاۋاپتى جولداستار قاتارلىلار ماجىلىسكە سىرتتاي قاتىناستى.
ءماجىلىستىڭ جابىلۋ سالتىنان كەيىن 13 - كەزەكتى مەملەكەتتىك حالىق قۇرىلتايىنىڭ تۇراقتى كوميتەتى 23 - رەتكى ارناۋلى تاقىرىپتاعى لەكسياسىن وتكىزدى، كوميتەت باستىعى لي جانشۋ باسقاردى. سىرتقى ەكونوميكا - ساۋدا داشۋەسى زاڭ شۋەيۋانىنىڭ پروفەسسورى، مەملەكەتتىك كەڭەستىڭ مونوپوليالاۋعا قارسى تۇرۋ كوميتەتى ماماندارى كەڭەس بەرۋ گرۋپپاسىنىڭ مۇشەسى حۋاڭ يۇڭ «مونوپوليالاۋعا قارسى زاڭ - ءتۇزىمىن كەمەلدەندىرىپ، باسەكە ساياساتىنىڭ نەگىزدىك ورنىن كۇشەيتەيىك» دەگەن تاقىرىپتا لەكسيا جاسادى.
