وسى زامانعى كاسىپتىك وقۋ - اعارتۋ جۇيەسىن جەدەل ورناتىپ، اناعۇرلىم كوپ جوعارى ساپالى تەحنيكالىق ونەر دارىندىلارىن، مايتالمان شەبەرلەردى، ءىرى ەل ۇستالارىن باۋلۋ كەرەك
لي كىچياڭ بەكىتۋ جاسادى
شينحۋا اگەنتتىگىنىڭ 4 - ايدىڭ 13 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جۋىقتا كاسىپتىك وقۋ - اعارتۋ قىزمەتى جونىندە ماڭىزدى نۇسقاۋ بەرىپ، بىلاي دەپ باسا دارىپتەدى: جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىندا كاسىپتىك وقۋ - اعارتۋدىڭ بولاشاعى كەڭ، ۇلكەن ىستەر تىندىرۋعا بولادى. پارتيانىڭ باسشىلىعىنا تاباندى بولىپ، دۇرىس ءبىلىم بەرۋ بەتالىسىنا تاباندى بولىپ، ونەگە كورسەتىپ ادام تاربيەلەۋگە تاباندى بولىپ، كاسىپتىك وقۋ - اعارتۋدىڭ ءتۇرى مەن ورنىن ساپالىلاندىرىپ، كاسىپ سالاسى مەن وقىتۋدىڭ توعىسۋىن، مەكتەپ پەن كاسىپورىن سەلبەستىگىن تەرەڭدەتىپ، ادام تاربيەلەۋ ءتاسىلى، ءبىلىم بەرۋ ۇلگىسى، باسقارۋ ءتۇزىلىسى، قامتاماسىز ەتۋ مەحانيزمى رەفورماسىن تەرەڭدەي ىلگەرىلەتىپ، كاسىپتىك تولىق كۋرس وقىتۋىن ورنىقتى قاداممەن دامىتىپ، جوعارى دەڭگەيلى كاسىپتىك مەكتەپتەر مەن ماماندىقتاردان ءبىر توبىن قۇرىپ، كاسىپتىك ءبىلىم بەرۋ مەن جالپىلىق ءبىلىم بەرۋدىڭ ساباقتاسۋىن ىلگەرىلەتىپ، كاسىپتىك وقۋ - اعارتۋدىڭ ۇيلەسىمدىلىگىن كۇشەيتىپ، وسى زامانعى كاسىپتىك وقۋ - اعارتۋ جۇيەسىن جەدەل ورناتىپ، اناعۇرلىم كوپ جوعارى ساپالى تەحنيكالىق ونەر دارىندىلارىن، مايتالمان شەبەرلەردى، ءىرى ەل ۇستالارىن باۋلۋ كەرەك. ءار دارەجەلى پارتكوم مەن ۇكىمەت تۇزىمدە جاڭالىق اشۋ، ساياسات بەرۋ، ۇسىنىلىم قوسۋ سەرپىنىن ارتتىرىپ، ۇستا رۋحىن اسقاقتاتىپ، تەحنيكالىق ونەر دارىندىلارىنىڭ قوعامدىق ورنىن جوعارىلاتىپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ ءۇشىن دارىندى جانە ونەر جاعىنان پارمەندى تىرەك ازىرلەۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي كىچياڭ بەكىتۋ جاساپ بىلاي دەپ اتاپ كورسەتتى: كاسىپتىك وقۋ - اعارتۋ − تەحنيكالىق ونەر دارىندىلارىن باۋلۋدىڭ، جۇمىستانۋدى، شارۋاشىلىق قۇرۋدى، جاڭالىق اشۋدى جەبەۋدىڭ، جۇڭگودا جاساۋ مەن قىزمەت وتەۋدىڭ دەڭگەيىن جوعارىلاتۋدى ىلگەرىلەتۋدىڭ ماڭىزدى نەگىزى. جاقىنعى جىلداردان بەرى وڭىرلەر، قاتىستى تاراۋلار پارتيا ورتالىق كوميتەتىنىڭ، مەملەكەتتىك كەڭەستىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، كاسىپتىك وقۋ - اعارتۋدىڭ دامۋىن ىلگەرىلەتۋدە ەلەۋلى ناتيجەگە قول جەتكىزدى. شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، مەملەكەتتىڭ وسىزاماندانۋ قۇرىلىسىنا قىزمەت وتەۋدى، جوعارى ساپالى دامۋدى ىلگەرىلەتۋدى كوزدەپ، رەفورما جاساۋدى، جاڭالىق اشۋدى كۇش سالا ىلگەرىلەتىپ، وزىق تاجىريبەلەردەن ۇلگى الىپ، جوعارى دەڭگەيلى، جوعارى ساتىلى تەحنيكالىق ونەر دارىندىلارىن باۋلۋ جۇيەسىن قۇرۋعا قۇلشىنۋ كەرەك. تەحنيكا وزگەرىسى مەن كاسىپ سالاسىن ساپالىلاندىرۋ، دەڭگەيىن جوعارىلاتۋ بەتالىسىن كوزدەپ، كاسىپ سالاسى مەن وقىتۋدىڭ توعىستىرۋىن، مەكتەپ پەن كاسىپورىن سەلبەستىگىن ىلگەرىلەتىپ، اناعۇرلىم كوپ جاستاردى كاسىپتىك ونەر ءتالىم - تاربيەسىن قابىلداۋعا باۋراپ، وقۋ - اعارتۋ تىزبەگىنىڭ، دارىندىلار تىزبەگىنىڭ كاسىپ سالاسى تىزبەگىمەن، جاڭالىق اشۋ تىزبەگىمەن ءونىمدى ۇشتاسۋىن جەبەۋ كەرەك. كاسىپتىك مەكتەپتەردىڭ وقىتۋشىلار قوسىنى جانە ءبىلىم بەرۋ شارت - جاعدايى قۇرىلىسىن كۇشەيتىپ، وقۋلىقتار مەن وقىتۋ ءتاسىلىن ساپالىلاندىرىپ، كەمەلدەندىرىپ، جۇڭگوشا ەرەكشەلىككە يە شاكىرت ءتۇزىمى جونىندە ىزدەنىس جاساپ، وقۋشىلاردىڭ ۇستا رۋحىن جانە توسەلە ءتۇسۋ داعدىسىن قالىپتاستىرۋىنا باسا ءمان بەرىپ، 100 ميلليونداعان جوعارى ساپالى تەحنيكالىق ونەر دارىندىلارىن جەتىلدىرۋگە قۇلشىنىپ، جاپپاي سوتسياليستىك وسىزاماندانعان مەملەكەت قۇرۋعا مىعىم تىرەك ازىرلەۋ كەرەك.
مەملەكەتتىك كاسىپتىك وقۋ - اعارتۋ ءماجىلىسى 4 - ايدىڭ 12 - كۇنىنەن 13 - كۇنىنە دەيىن بەيجيڭدە اشىلدى، ماجىلىستە شي جينپيڭنىڭ ماڭىزدى نۇسقاۋى جانە لي كىچياڭنىڭ بەكىتۋى جەتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى سۇن چۇنلان ماجىلىسكە قاتىناستى ءارى ءسوز سويلەدى. ول بىلاي دەپ اتاپ كورسەتتى: باس شۋجي شي جينپيڭنىڭ كاسىپتىك وقۋ - اعارتۋ جونىندەگى ماڭىزدى نۇسقاۋىن ىشكەرىلەي دايەكتىلەندىرىپ، لي كىچياڭ زۇڭليدىڭ بەكىتۋىنىڭ تالابىن تياناقتاندىرىپ، ونەگە كورسەتىپ ادام تاربيەلەۋگە تاباندى بولىپ، ءتۇرى مەن ورنىن ساپالىلاندىرىپ، وسى زامانعى كاسىپتىك وقۋ - اعارتۋ جۇيەسىن جەدەل قۇرۋ كەرەك. ورتا دارەجەلى كاسىپتىك، جوعارى دارەجەلى كاسىپتىك، تولىق كۋرس كاسىپتىك وقۋ - اعارتۋ بويىنشا باۋلۋ جۇيەسىن ءبىر تۇلعالاندىرا جوبالاپ، ”وقىتۋشى، وقۋلىق، وقىتۋ ءادىسى“ رەفورماسىن تەرەڭدەتىپ، ”جۇمىس ورنى، ساباق، جارىس، كۋالىك “ بويىنشا كەشەندى تۇردە ادام تاربيەلەپ، وقۋ - اعارتۋ ساپاسىن جوعارىلاتۋ كەرەك. كوپ نەگىزدى وقۋ - اعارتۋ ارناسىن اقاۋسىزداندىرىپ، كاسىپ سالاسى مەن وقىتۋدى توعىستىرۋ، مەكتەپ پەن كاسىپورىن سەلبەستىگى ساياساتىن ناقتىلاندىرىپ، كاسىپتىك وقۋ - اعارتۋدىڭ ەرەكشەلىگىنە ۇيلەسەتىن باعالاۋ ءادىسى جونىندە ىزدەنىس جاساۋ كەرەك. وڭىرلەر، تاراۋلار قامتاماسىز ەتۋ سەرپىنىن ارتتىرىپ، تەحنيكالىق ونەر دارىندىلارىنا جاسالاتىن مامىلەنى جوعارىلاتىپ، كاسىپتىك دامۋ ارناسىن ىركىلىسسىزدەندىرىپ، كاسىپتىك وقۋ - اعارتۋدى مويىنداۋ دەڭگەيىن جانە ونىڭ باۋراۋ قۋاتىن كۇشەيتۋ كەرەك.
مەملەكەتتىك كەڭەستىڭ مۇشەسى، قوسىمشا مەملەكەتتىك كەڭەستىڭ باس حاتشىسى شياۋ جيە ءماجىلىستى باسقاردى. مەملەكەتتىك دامۋ جانە رەفورما كوميتەتىندەگى، قازىنا مينيسترلىگىندەگى، ادام كۇشى بايلىعى جانە قوعامدىق قامتاماسىزداندىرۋ مينيسترلىگىندەگى، شاندۇڭداعى، جياڭسۋداعى، جياڭشيدەگى، گانسۋدەگى، جۇڭحۋا كاسىپتىك وقۋ - اعارتۋ قوعامىنداعى، جۇڭچى توبىنداعى، حۋاۋي تەحنيكالىق شەكتى سەرىكتەستىگىندەگى قاتىستى جاۋاپتى جولداستار ماجىلىستە سوزگە شىقتى.
ءارقايسى ولكە، رايون، توتە قاراستى قالالار مەن جوسپارى بولەك جاسالاتىن قالالارداعى، شينجياڭ ءوندىرىس - قۇرىلىس بيڭتۋانىنداعى وقۋ - اعارتۋ قىزمەتىنە جاۋاپتى جولداستار، ورتالىق پەن مەملەكەتتىك ورگانداردىڭ قاتىستى تاراۋلارىنداعى، قاتىستى حالىقتىق ۇيىمدارداعى، ورتالىق اسكەري ىستەر كوميتەتى ورگانىنىڭ قاتىستى تاراۋلارىنداعى جانە ءبىر ءبولىم كاسىپتىك قوعامدارداعى، كاسىپورىندارداعى، جوعارى مەكتەپتەردەگى، كاسىپتىك مەكتەپتەردەگى جاۋاپتى جولداستار، ت.ب ماجىلىسكە قاتىناستى.
