13 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى ەكىنشى جالپى جيىنىن وتكىزدى

　　شي جينپيڭ، لي كىچياڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار قاتىناستى

　　لي جانشۋ مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى

　　ەڭ جوعارى حالىق سوتى مەكەمەسىنىڭ قىزمەت بايانداماسى مەن ەڭ جوعارى حالىق پروكۋراتۋراسىنىڭ قىزمەت بايانداماسى تىڭدالدى جانە قارالدى

　　شينحۋا اگەنتتىگى، 3 - ايدىڭ 8 – كۇنى، بەيجيڭ. 13 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى 3 - ايدىڭ 8 - كۇنى تۇستەن كەيىن حالىق سارايىندا ەكىنشى جالپى جيىنىن وتكىزىپ، مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسىن جانە ەڭ جوعارى حالىق سوتى مەكەمەسىنىڭ قىزمەت بايانداماسىن، ەڭ جوعارى حالىق پروكۋراتۋراسىنىڭ قىزمەت بايانداماسىن تىڭدادى جانە قارادى.

　　شي جينپيڭ، لي كىچياڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار ماجىلىسكە قاتىناستى.

　　مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن كوميتەت باستىعى لي جانشۋ ماجىلىسكە مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى. لي جانشۋ بايانداماسىندا مىنالاردى اتاپ كورسەتتى: شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا مەملەكەتتىك حالىق قۇرىلتايى تۇراقتى كوميتەتى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋدە تاباندى بولىپ، شي جينپيڭ زاڭمەن جونگە سالۋ يدەياسىن ىشكەرىلەي دايەكتىلەندىرىپ، مىندەت اتقارىپ، جاۋاپكەرلىكتى ادا ەتىپ، بەلسەنە ءىس تىندىرىپ، كەلەلى قىزمەت ورنالاستىرۋلارىن ىلگەرىلەتۋدى، اۋىر حاۋىپ - قاتەر مەن سىن - سايىسقا توتەپ بەرۋدى، مەملەكەت حاۋىپسىزدىگىن قورعاۋدى زاڭدىق كەپىلمەن قامداپ، مەملەكەتتىڭ بيلىكتى ورگانى بولۋداعى قىزمەت قابىلەتى مەن رولىن ءونىمدى ساۋلەلەندىردى.

　　لي جانشۋ باياندامادا بىلاي دەپ اتاپ كورسەتتى: 13 - كەزەكتى مەملەكەتتىك حالىق قۇرىلتايىنىڭ 3 - ماجىلىسىنەن بەرى تۇراقتى كوميتەت 9 زاڭ شىعاردى. 13 زاڭعا وزگەرىس ەنگىزدى، زاڭدىق ماسەلەلەر مەن كەلەلى ماسەلەلەرگە قاتىستى 8 ۇيعارىم شىعاردى. قازىر قارالىپ جاتقان 23 نۇسقا زاڭ جوباسى بار؛ 35 باياندامانى تىڭدادى جانە قارادى، ءبىر ۇيعارىم مەن 6 زاڭنىڭ اتقارىلۋ احۋالىن تەكسەردى، 2 رەت ارناۋلى تاقىرىپتا پىكىر الدى، 6 ارناۋلى تاقىرىپتا تەكسەرۋ - زەرتتەۋ جۇرگىزدى، ءبىر قاۋلى شىعاردى؛ 7 شارتتى بەكىتۋدى نەمەسە وعان قاتىناسۋدى ۇيعاردى؛ مىندەتكە تاعايىنداۋ، مىندەتىنەن قالدىرۋ بويىنشا 39 جوبانى قاراپ ماقۇلدادى، مەملەكەت قىزمەتكەرلەرى جونىنەن زاڭ بويىنشا 259 ادام رەت مىندەتكە تاعايىندادى جانە مىندەتىنەن قالدىردى.

　　لي جانشۋ باياندامادا بىلاي دەپ اتاپ كورسەتتى: تۇراقتى كوميتەت قىزمەتىنىڭ ەڭ كورنەكتى ەرەكشەلىگى − پارتيا ورتالىق كوميتەتىنىڭ كەلەلى شەشىم، ورنالاستىرۋلارىنا تىعىز ىلەسىپ، حالىق بۇقاراسىنىڭ تاماشا تۇرمىستى زاڭمەن جونگە سالۋ قۇرىلىسىنا دەگەن ۇنىنە، تىلەگىنە تىعىز جاناسىپ، مەملەكەتتى جونگە سالۋ جۇيەسى مەن جونگە سالۋ قابىلەتىن وسىزامانداندىرۋ بارىسىندا العا قويىلعان زاڭدىق سۇرانىستىڭ ءىس جۇزىندىك جاعدايىمەن تىعىز ۇشتاستىرىپ، زاڭ شىعارۋ مەن زاڭدىق باقىلاۋدى كۇشەيتىپ، ءتۇرلى قىزمەتتىڭ وزەكتى جانە جالپى جاعدايدى اناعۇرلىم ويداعىداي ارقاۋ ەتۋىنە، مەملەكەت پەن حالىققا اناعۇرلىم ويداعىداي قىزمەت ەتۋىنە مۇمكىندىك جاساۋ. ءبىرىنشى، نەگىزگى زاڭدى اتقارۋ مەن باقىلاۋدى كۇشەيتىپ، مەملەكەتتىڭ زاڭمەن جونگە سالۋ بىرلىگىن قورعادى. مەملەكەت تۋى زاڭىنا، مەملەكەت گەربى زاڭىنا وزگەرىس ەنگىزىپ، شياڭگاڭ ەرەكشە اكىمشىلىك رايونىندا مەملەكەت حاۋىپسىزدىگىن قورعاۋ زاڭىن قاراپ ماقۇلدادى. ەكىنشى، پارتيا مەن مەملەكەت قىزمەتىنىڭ جالپى جاعدايىن ارقاۋ ەتىپ، حالىقتىڭ تىلەگىنە سايكەسىپ، ءتۇيىندى سالالاردا زاڭ شىعارۋدى كۇشەيتتى. الەۋمەتتىك دەنساۋلىق ساقتاۋ جونىندە زاڭ شىعارۋدى، زاڭعا وزگەرىس ەنگىزۋدى كۇشەيتىپ، مەملەكەت حاۋىپسىزدىگى جونىندە زاڭ شىعارۋدى جەدەلدەتىپ، ساپالى دامۋ مەن جوعارى دەڭگەيدە سىرتقا ەسىك اشۋدى ىلگەرىلەتۋ توڭىرەگىندە زاڭ شىعاردى. ءۇشىنشى، باقىلاۋ بارىسىندا قولداۋ كورسەتۋدە تاباندى بولىپ، زاڭدىق باقىلاۋ مەن قىزمەتتى باقىلاۋدى زاڭ بويىنشا ورىستەتتى. نەگىزگى زاڭ مەن زاڭداردىڭ جاپپاي ءونىمدى اتقارىلۋىن ىلگەرىلەتىپ، اكىمشىلىك ۇقىقتىڭ، باقىلاۋ - تەكسەرۋ ۇقىعىنىڭ، سوت جۇرگىزۋ ۇقىعىنىڭ، پروكۋراتۋرا ۇقىعىنىڭ زاڭ بويىنشا جۇرگىزىلۋىنە شىنايى كەپىلدىك ەتتى. ءتورتىنشى، ۋاكىلدەردىڭ تۇلعالىق ورنىندا تاباندى بولىپ، ۋاكىلدەردىڭ زاڭ بويىنشا مىندەت اتقارۋىن قولدادى جانە وعان قىزمەت وتەدى. مەملەكەتتىك حالىق قۇرىلتايىنىڭ ۋاكىلدەر قىزمەتىن كۇشەيتۋ جانە جاقسارتۋ جونىندەگى «35 ناقتى شاراسىن» مۇقيات تياناقتاندىرىپ، ۋاكىلدەر قىزمەتىنىڭ دەڭگەيىن ۇزدىكسىز جوعارىلاتتى. بەسىنشى، مەملەكەتتىڭ ديپلوماتيالىق جالپى جاعدايىنا قىزمەت وتەپ، حالىق قۇرىلتايىنىڭ ديپلوماتيا قىزمەتىندەگى فۋنكتسيالىق رولىن ساۋلەلەندىردى. التىنشى، مىندەت وتەۋ قابىلەتى قۇرىلىسىن كۇشەيتىپ، تۇراقتى كوميتەتتىڭ وزىندىك قۇرىلىس ورەسىن ۇزدىكسىز جوعارىلاتتى.

　　لي جانشۋ بايانداماسىندا مىنالاردى اتاپ كورسەتتى: تۇراقتى كوميتەت قىزمەتىندە ءالى دە كەيبىر پارىقتار مەن جەتەرسىزدىكتەر بار، ۋاكىلدەر مەن ءار جاقتىڭ ۇسىنىس - پىكىرلەرىن كىشپەيىلدىكپەن تىڭداپ، قىزمەتتى ۇزدىكسىز كۇشەيتىپ جانە جاقسارتىپ، نەگىزگى زاڭ مەن زاڭدار جۇكتەگەن قىزمەت جاۋاپكەرلىگىن اناعۇرلىم ويداعىداي اتقارامىز.

　　لي جانشۋ بىلاي دەپ اتاپ كورسەتتى: 2021 - جىل − «14 – بەسجىلدىق» جوسپاردى اتقارىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىن باستاۋداعى العاشقى جىل، سونداي - اق جۇڭگو كوممۋنيستىك پارتياسى قۇرىلعانىنىڭ 100 جىلدىعى. تۇراقتى كوميتەت قىزمەتىنىڭ جالپى تالابى: شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، شي جينپيڭ زاڭمەن جونگە سالۋ يدەياسى مەن باس شۋجي شي جينپيڭنىڭ حالىق قۇرىلتايى تۇزىمىندە تاباندى بولۋ جانە ونى كەمەلدەندىرۋ جونىندەگى ماڭىزدى يدەياسىن ىشكەرىلەي ۇيرەنىپ، دايەكتىلەندىرىپ، پارتيا 19 - قۇرىلتايىنىڭ جانە پارتيا 19 - كەزەكتى ورتالىق كوميتەتىنىڭ ەكىنشى، ءۇشىنشى، ءتورتىنشى، بەسىنشى جالپى ماجىلىستەرىنىڭ رۋحىن جاپپاي دايەكتى تياناقتاندىرىپ، پارتيا باسشىلىعىنىڭ، حالىقتىڭ وزىنە - ءوزى قوجا بولۋىنىڭ، مەملەكەتتى زاڭمەن جونگە سالۋدىڭ ورگانيكالى بىرلىگىندە تاباندى بولىپ، جاڭا دامۋ ساتىسىن تياناق ەتىپ، جاڭا دامۋ ۇستانىمىن دايەكتىلەندىرىپ، جاڭا دامۋ جۇيەسىن ورناتىپ، «14 - بەسجىلدىق» جوسپار مەن 2035 – جىلعا دەيىنگى بولاشاقتىق نىسانانى تىعىز ارقاۋ ەتە وتىرىپ حالىق قۇرىلتايى قىزمەتىن جوسپارلاپ، زاڭ شىعارۋ ۇقىعىن، باقىلاۋ ۇقىعىن، ۇيعارىم جاساۋ ۇقىعىن، مىندەتكە تاعايىنداۋ، مىندەتىنەن قالدىرۋ ۇقىعىن زاڭ بويىنشا جۇرگىزىپ، جاپپاي سوتسياليستىك وسىزاماندانعان مەملەكەت قۇرۋداعى فۋنكتسيالىق رولدى ويداعىداي ساۋلەلەندىرۋ.

　　لي جانشۋ باياندامادا تۇراقتى كوميتەتتىڭ بۇدان بىلايعى ءبىر جىلداعى باستى مىندەتتەرى جونىندە ورنالاستىرۋ جاسادى: نەگىزگى زاڭدى اتقارۋ مەن زاڭنىڭ اتقارىلۋىن باقىلاۋدى شىنايى كۇشەيتىپ، نەگىزگى زاڭنىڭ ابىرويى مەن بەدەلىن قورعاۋ؛ ءتۇيىندى سالالاردا، جاڭادان گۇلدەنگەن سالالاردا، شەتەلگە ساياتىن سالالاردا زاڭ شىعارۋدى شىنايى كۇشەيتىپ، زاڭ شىعارۋ ساپاسى مەن ونىمدىلىگىن ۇزدىكسىز جوعارىلاتۋ؛ باقىلاۋ قىزمەتىن شىنايى كۇشەيتىپ، مەملەكەت ورگاندارىنىڭ مىندەتىن زاڭ بويىنشا اتقارۋىنا شىنايى كەپىلدىك ەتۋ؛ ۋاكىلدەر قىزمەتىن شىنايى كۇشەيتىپ، ۋاكىلدەردىڭ رولىن اناعۇرلىم ويداعىداي ساۋلەلەندىرۋ؛ حالىق قۇرىلتايىنىڭ ديپلوماتيا قىزمەتىن شىنايى كۇشەيتىپ، ءار جىكتەگى، ءار سالاداعى اۋىس - كۇيىستى، سەلبەستىكتى تەرەڭدەتۋ جانە كەڭەيتۋ؛ وزىندىك قۇرىلىستى شىنايى كۇشەيتىپ، مىندەت اتقارۋداعى يدەيالىق، ساياسي، ۇيىمدىق نەگىزدى بەكەمدەۋ.

　　ەڭ جوعارى حالىق سوتى مەكەمەسىنىڭ باستىعى جوۋ چياڭ ەڭ جوعارى حالىق سوتى مەكەمەسىنىڭ قىزمەت بايانداماسىندا بىلاي دەپ اتاپ كورسەتتى: 2020 - جىلى ەڭ جوعارى حالىق سوتى مەكەمەسى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋدە تاباندى بولىپ، نەگىزگى زاڭ مەن زاڭداردا جۇكتەلگەن قىزمەت جاۋاپكەرلىگىن ادالدىقپەن اتقارىپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى زاڭ بويىنشا ءبىر تۇتاس ىلگەرىلەتۋگە قىزمەت ەتىپ، ءتۇرلى قىزمەتتە تىڭ تابىستارعا قول جەتكىزدى. ەڭ جوعارى حالىق سوت مەكەمەسى 39 مىڭ 347 دەلونى قابىلداپ، 35 مىڭ 773 دەلونى قاراپ اياقتاتتى؛ جەرگىلىكتى ءار دارەجەلى حالىق سوت مەكەمەلەرى مەن ارناۋلى حالىق سوت مەكەمەلەرى 30 ميلليون 805 مىڭ دەلونى قابىلداپ، 28 ميلليون 705 مىڭ دەلونى قاراپ اياقتاتتى، اتقاردى.

　　جوۋ چياڭ باياندامادا 2020 - جىلعى باستى قىزمەتتەردى 7 جاقتان قورىتىندىلادى: ءبىرىنشى، مەملەكەتتىڭ حاۋىپسىزدىگى مەن قوعامنىڭ ورنىقتىلىعىن باتىل قورعادىق؛ ەكىنشى، ساپالى دامۋعا بەلسەنە قىزمەت وتەدىك؛ ءۇشىنشى، حالىق بۇقاراسىنىڭ زاڭدى ۇقىق - مۇددەسىن شىنايى قورعادىق؛ ءتورتىنشى، ءبىر ورىنعا شوعىرلانعان، كوپ نەگىزدەنگەن تالاس - تارتىستى شەشۋ جانە ارىز - شاعىمعا قىزمەت وتەۋ مەحانيزمىن جاپپاي ورناتتىق؛ بەسىنشى، ءادىليا ءتۇزىلىسى رەفورماسىن كۇش سالا تەرەڭدەتتىك؛ التىنشى، ادال، كىرشىكسىز، جاۋاپكەرلىك ارقالايتىن ىسىلعان سوت مەكەمەسى قوسىنىن سومدادىق؛ جەتىنشى، باقىلاۋدى سانالىلىقپەن قابىلدادىق.

　　جوۋ چياڭ باياندامادا مىنانى ءبىلدىردى: 2021 - جىلى جانە بۇدان بىلايعى ءبىر مەزگىلدە حالىق سوتى مەكەمەسى ساپالى دامۋ تاقىرىبىن ىلگەرىلەتۋدى مىقتاپ ارقاۋ ەتىپ، جاڭا دامۋ كەزەڭىن تياناق ەتىپ، جاڭا دامۋ ۇستانىمىن دايەكتىلەندىرىپ، جاڭا دامۋ جاعدايىن ورناتۋ تالابىن دۇرىس يگەرىپ، جۇيەلى كوزقاراسقا، زاڭمەن جونگە سالۋ وي جەلىسىنە، نەگىزدى بەكەمدەۋ بەتالىسىنا اناعۇرلىم ءمان بەرىپ، ورنىقتىلىق بارىسىندا ىلگەرىلەۋدە، دۇرىس جولدان جازباي، جاڭالىق اشۋدا تاباندى بولىپ، جاڭا داۋىردەگى حالىق سوتى مەكەمەسى قىزمەتىنىڭ ساپالى دامۋىن ىلگەرىلەتەمىز. ساياسي قۇرىلىستى كۇشەيتىپ، جالپى جاعدايعا بەلسەنە قىزمەت وتەپ، ءادىليانى حالىق ءۇشىن جۇرگىزۋدە تاباندى بولىپ، ءادىليانى قاتاڭ، ءادىل جۇرگىزىپ، ءادىليا رەفورماسىن تەرەڭدەتىپ، ىسىلعان قوسىن قۇرامىز. شىندىققا جۇگىنىپ، ناقتى ءىس ىستەپ، ءورىس اشا جاڭالىق جاراتۋدى تالاپ ەتىپ، سوتتىڭ فۋنكتسيالىق رولىن تولىق ساۋلەلەندىرىپ، جاپپاي سوتسياليستىك وسىزاماندانعان مەملەكەت قۇرۋعا، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋعا تىڭ دا اناعۇرلىم زور ۇلەس قوسامىز.

　　ەڭ جوعارى حالىق پروكۋراتۋراسىنىڭ باس پروكۋرورى جاڭ جۇن ەڭ جوعارى حالىق پروكۋراتۋراسىنىڭ قىزمەت بايانداماسىندا بىلاي دەپ اتاپ كورسەتتى: وتكەن ءبىر جىلدا شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، مەملەكەتتىك حالىق قۇرىلتايى مەن ونىڭ تۇراقتى كوميتەتىنىڭ پارمەندى باقىلاۋىندا ەڭ جوعارى حالىق پروكۋراتۋراسى ءتۇرلى حاۋىپ - قاتەر مەن سىن - سايىسقا، اسىرەسە، جاڭا تيپتى ايدارشا ۆيرۋس وكپە قابىنۋ ىندەتىنىڭ اۋىر سوققىسىنا، ىقپالىنا بەلسەنە توتەپ بەرىپ، ءتۇرلى قىزمەتتە تىڭ ىلگەرىلەۋشىلىككە قول جەتكىزدى. ءبىر جىلدان بەرى بۇكىل ەلدەگى پروكۋراتۋرا ورگاندارى ءار تۇردەگى جيىنى 3 ميلليون 10 مىڭ دەلونى ءبىر جاقتى ەتتى، بۇل سايكەس مەزگىلدەگىدەن %19.4 تومەندەدى، مۇنىڭ ىشىندە مىندەتىن ىرىقتىلىقپەن اتقارۋعا ساياتىن الەۋمەتتىك يگىلىك ارىز - شاعىمى، ارىز - شاعىم باقىلاۋ دەلولارى سايكەس مەزگىلدەگىدەن جەكە - جەكە %19.2 جانە %9.6 جوعارىلادى.

　　جاڭ جۇن باياندامادا 2020 - جىلعى قىزمەتتەرگە 5 جاقتان شولۋ جاسادى: ءبىرىنشى، مەملەكەتتى جونگە سالۋعا بەلسەنە ات سالىسىپ، پروكۋراتۋرامەن قامتاماسىز ەتۋ ارقىلى جۇڭگونىڭ جونگە سالۋ ىستەرىنە دەم بەردىك؛ ەكىنشى، دامۋدىڭ جالپى جاعدايىمەن ىرىقتىلىقپەن توعىسىپ، پروكۋراتۋرالىق قىزمەت وتەۋ ارقىلى جاپپاي دوڭگەلەك داۋلەتتى قوعام قۇرۋعا دەم بەردىك؛ ءۇشىنشى، «ءتورت ءىرى پروكۋراتۋرا قىزمەتىن» جاپپاي ىلگەرىلەتىپ، پروكۋراتۋرالىق باقىلاۋ ارقىلى ادىلدىك پەن ادىلەتتىلىكتى قورعادىق؛ ءتورتىنشى، حالىق تىلەگى سىندى وسى ەڭ ۇلكەن ساياسيدى مىقتاپ ارقاۋ ەتىپ، پروكۋراتۋرا ارقىلى حالىقتىڭ ىرىس – قۇتىن مولايتتىق؛ بەسىنشى، تەمىر سوقساڭ، قۇرىش بول دەگەندى ەستە بەرىك ساقتاپ، پروكۋراتۋرا قۇرىلىسى ارقىلى مىندەتتى زاڭ بويىنشا اتقارۋعا كەپىلدىك ەتتىك.

　　جاڭ جۇن باياندامادا بىلاي دەپ اتاپ كورسەتتى: 2021 - جىلى پروكۋراتۋرا قىزمەتكەرلەرى اناعۇرلىم سانالى تۇردە جاۋاپكەرلىك ارقالاپ، ىسكەرلىك كورسەتىپ، جاڭا تاريحي بورىشتى ارقالاپ، جاپپاي سوتسياليستىك وسىزاماندانعان مەملەكەت قۇرۋدا جاقسى باستاما باستاۋعا، جاقسى قادام تاستاۋعا زاڭمەن جونگە سالۋ جاعىنان پارمەندى كەپىلدىك ازىرلەيدى. ۇزدىكسىز ورنىقتى ىلگەرىلەپ، ساپالى دامۋعا قىزمەت وتەۋ ساياسي سانالىلىعىن شىنايى كۇشەيتەدى؛ تياناقتاندىرۋدى مىقتى يگەرىپ، مەملەكەتتى جاپپاي زاڭمەن جونگە سالۋمەن توعىستىرۋ سىندى زاڭمەن جونگە سالۋ سانالىلىعىن شىنايى كۇشەيتەدى؛ قۇلشىنا جوعارىلاتىپ، ءوزىنىڭ ساپالى دامۋىن جۇزەگە اسىرۋداعى پروكۋراتۋرا سانالىلىعىن شىنايى كۇشەيتەدى. حالىقتىڭ باقىتىن، مەملەكەتتىڭ حاۋىپسىزدىگىن، قوعامنىڭ ورنىقتىلىعىن قامتاماسىز ەتۋگە اناعۇرلىم زور ۇلەس قوسادى.

　　ماجىلىسكە قاتىناسۋعا ءتيىستى ۋاكىلدەر 2 مىڭ 953 ادام، 2 مىڭ 895 ادام قاتىناستى، 58 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.

　　ءماجىلىستى ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى ۋاڭ چىن باسقاردى.

　　بۇگىن − «8 - ناۋرىز» حالىقارالىق ەڭبەكشى ايەلدەر مەرەكەسى، ءماجىلىس ءماجىلىس ءتوراعالار القاسى اتىنان ايەل ۋاكىلدەرگە، ايەل مۇشەلەرگە، ايەل قىزمەتكەرلەرگە، بۇكىل ەلدەگى ءار ۇلت، ءار سالا ايەلدەرىنە، دۇنيە ءجۇزىنىڭ ءار ەلىندەگى ايەلدەرگە مەرەكەلىك سالەم جولدادى جانە ىزگى تىلەك ءبىلدىردى.

　　ءماجىلىستىڭ اتقارۋشى ءتوراعالارى ما فىڭگو، ۋاڭ دۇڭفىڭ، ۋاڭ گۋاڭيا، ۋاڭ جيانجۇن، يىن لي، شى تايفىڭ، باي چۇنلي، ليۋ ي - لياڭ، ليۋ گوجۇڭ، ليۋ جيا - ي، شۇي چيلياڭ، رۋان چىڭفا، لي يۇيمەي، لي ۋەي، لي شۋەيۇڭ، ۋ يۇيلياڭ، يىڭ يۇڭ، شىن شياۋميڭ، چىن چۋانگو، چىن شي - ۋىن، يۋان جياجۇن، حۋاڭ جىشيان، پىڭ چيڭحۋا، جياڭ جوچيڭ، جيڭ جۇنحاي ءتوراعالار مىنبەسىنىڭ اتقارۋشى ءتوراعالار ورنىنا جايعاستى.