1. اعىمداعى ورىن:
  2. باس بەت
  3. اعىم جاڭالىقتارى
  4. ەل ءىشى حابارالرى
  5. زاڭ - ەرەجە

شي جينپيڭ ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسىنىڭ وقۋ باستاۋ سالتىندا ماڭىزدى ءسوز سويلەپ مىنانى دارىپتەدى

پارتيانىڭ داڭقتى ءداستۇرى مەن تاڭداۋلى ستيلىنىڭ ادال مۇراگەرى بولۋعا بەل بايلاپ، جاڭا ءداۋىر، جاڭا جورىقتا ەرلىكپەن الدا ءجۇرىپ، ەڭبەك ءسىڭىرىپ، ۇلەس قوسۋ كەرەك

ۋاڭ حۋنيڭ وقۋ باستاۋ سالتىنا قاتىناستى

日期:2021年03月02日
来源:人民网
【字体:

 «حالىق گازەتى»، 3 - ايدىڭ 1 - كۇنى، بەيجيڭ. 2021 - جىلعى كوكتەمگى وقۋ ماۋسىمىنداعى ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسى 3 - ايدىڭ 1 - كۇنى تۇستەن بۇرىن ورتالىق پارتيا مەكتەبىندە وقۋ باستادى. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ وقۋ باستاۋ سالتىندا ماڭىزدى ءسوز سويلەپ بىلاي دەپ دارىپتەدى: مەيلى وتكەندە، قازىر، الدە بولاشاقتا بولسىن، پارتيانىڭ داڭقتى ءداستۇرى مەن تاڭداۋلى ستيلى ءبىزدى جاپا - ماشاقاتتان قورىقپاي، ەرلىكپەن العا باسۋعا شابىتتاندىراتىن باعالى رۋحاني بايلىق سانالادى. جاس كادرلار − پارتيا مەن مەملەكەت ىستەرىنىڭ ءىزباسارلارى، ءسوز جوق، پارتيانىڭ داڭقتى ءداستۇرى مەن تاڭداۋلى ستيلىنىڭ ادال مۇراگەرى بولۋعا بەل بايلاپ، ەرىك - جىگەردى، توزىمدىلىكتى، ۇستامدىلىقتى ۇزدىكسىز كۇشەيتىپ، جاڭا داۋىردە سوتسياليستىك وسىزاماندانعان مەملەكەتتى جاپپاي قۇرۋدىڭ جاڭا جورىعىندا ەرلىكپەن العا ۇمتىلىپ، ۇلەس قوسىپ، پارتياعا، حالىققا، داۋىرگە لايىق ناتيجە جاراتۋعا قۇلشىنۋى كەرەك!

  ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ۋاڭ حۋنيڭ وقۋ باستاۋ سالتىنا قاتىناستى.

  شي جينپيڭ بىلاي دەپ دارىپتەدى: پارتيامىز حالىقتى ىنتىماقتاستىرىپ جانە باستاپ، توڭكەرىستىڭ، قۇرىلىستىڭ، رەفورمانىڭ ۇلى تابىستارىنا قول جەتكىزدى، ەڭ ماڭىزدىسى، پارتيامىز ۇزاق ۋاقىتتىق اماليات بارىسىندا ءبىر تۇتاس داڭقتى ءداستۇر مەن تاماشا ستيلدى جەتىلدىردى جانە وندا تاباندى بولدى. وسى داڭقتى ءداستۇر مەن تاماشا ستيل − پارتيامىزدىڭ سيپاتى مەن تۇپكى ماقساتىنىڭ شوعىرلى بەينەلەنۋى، پارتيامىزدىڭ باسقا ساياسي پارتيالاردان پارىقتالاتىن كورنەكتى بەلگىسى. پارتيا حالىق بۇقاراسىنىڭ قولداۋى مەن جاقتاۋىنا يە بولۋ ءۇشىن، ءسوز جوق، پارتيانىڭ داڭقتى ءداستۇرى مەن تاڭداۋلى ستيلىن تاباندىلىقپەن ساۋلەلەندىرۋى كەرەك.

  شي جينپيڭ بىلاي دەپ اتاپ كورسەتتى: بۇگىنگى دۇنيەدە ءجۇز جىلدان بەرى بولماعان زور وزگەرىس جەدەل ىلگەرىلەۋدە، ەلىمىز جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ شەشۋشى كەزەڭىندە تۇر، جاپپاي دوڭگەلەك داۋلەتتى قوعام قۇرۋدا ۇلى تاريحي تابىستارعا قول جەتكىزدىك، كەدەيلىكتەن ارىلتۋدان قامال الۋ شايقاسىندا جالپى بەتتىك جەڭىسكە قول جەتكىزدىك، جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىن ءساتتى باستادىق، سونىمەن بىرگە، ءبىز العا باسۋ جولىمىزدا ءالى دە كوپتەگەن قيىن وتكەلدەر مەن سىن - سايىسقا ءدوپ كەلىپ وتىرمىز. حاۋىپ - قاتەر نەعۇرلىم زور، سىن - سايىس نەعۇرلىم كوپ، مىندەت نەعۇرلىم اۋىر بولعان سايىن، پارتيانىڭ ستيل قۇرىلىسىن سولعۇرلىم كۇشەيتىپ، تاماشا ستيلمەن رۋحتى سەرپىلتىپ، جىگەردى تاسقىنداتىپ، وبراز ورناتىپ، حالىقتىڭ قالاۋىنان شىعۋىمىز كەرەك.

  شي جينپيڭ بىلاي دەپ دارىپتەدى: پارتياعا ادال بولۋ − كوممۋنيستەردىڭ ماڭداي الدى ساياسي قاسيەتى. پارتيامىز تالاي تار جول، تايعاق كەشۋلەردى باستان كەشىردى، ءبىراق ءارقانداي قيىنشىلىق ءبىزدى كۇيرەتە المادى، ءارقانداي جاۋ ءبىزدى جوعالتا المادى، وسى بارىستاردا سان مىڭداعان پارتيا مۇشەسىنىڭ ادالدىعىنا سۇيەندىك. پارتياعا ادال بولۋدا، ءسوز جوق، ءبىر نيەت، ءبىر تىلەكتە بولىپ، جۇمىستى دايەكتى ىستەپ، ءىشى مەن سىرتى بىردەي بولىپ، ءبىلىم مەن ارەكەتتى ۇشتاستىرىپ، ءارقانداي ۋاقىتتا، ءارقانداي جاعدايدا، نيەتتەن اينىماۋ، ەرىك - جىگەردى وزگەرتپەۋ، ماندىك قاسيەتتى بۇلدىرمەۋ كەرەك. جاس كادرلار اعا بۋىن قۇربانداردى اينا ەتىپ، ۇنامسىز تيپتەردەن عيبىرات الىپ، سەنىم نەگىزىن ۇزدىكسىز بەكەمدەپ، رۋحاني كالتسيدى تولىقتاپ، يدەيا تىزگىنىن مىقتى يگەرىپ، بەرىك مۇرات - سەنىم ارقىلى پارتياعا دەگەن قالتقىسىز ادالدىعىن شىڭداۋى كەرەك. ساياسي شىنىعۋدى سانالى تۇردە كۇشەيتىپ، پارتيا ىشىندەگى قاتاڭ ساياسي تۇرمىس جاعىنان شىڭدالۋدى قابىلداپ، ساياسي تۇجىرىم جاساۋ قابىلەتىن، ساياسي سانالىلىقتى، ساياسي اتقارۋ قابىلەتىن ۇزدىكسىز جوعارىلاتىپ، ءوزىنىڭ ساياسي قابىلەتىن قىزمەت مىندەتىمەن سايكەستىرۋ كەرەك. پارتيانىڭ قامىن ويلاۋعا بەل بايلاپ، مەملەكەت ءۇشىن جاۋاپكەرلىگىن ادا ەتىپ، حالىق ءۇشىن ۇلەس قوسىپ، جاپا - ماشاقاتتان تايسالماي، قيىندىقتان قورىقپاي، اۋىر مىندەت ارقالاپ، حاۋىپ - قاتەردى ارقالاپ، ءىس جۇزىندىك ارەكەت ارقىلى پارتياعا ادالدىقتى ايگىلەۋ كەرەك.

  شي جينپيڭ مىنالاردى اتاپ كورسەتتى: پارتيامىزدىڭ تاريحى قاي كەزدە نازاريانى امالياتپەن ۇشتاستىرىپ ويداعىداي جالعاستىرساق، پارتيا مەن حالىق ىستەرىنىڭ ۇزدىكسىز جەڭىسكە جەتە الاتىنىن؛ كەرىسىنشە بولسا، پارتيا مەن حالىق ىستەرىنىڭ زيانعا ۇشىرايتىنىن، ءتىپتى اۋىر بۇراڭدىقتار تۋىلاتىنىن قايتا - قايتا دالەلدەدى. نازاريانى امالياتپەن ۇشتاستىرۋدىڭ العى شارتى − نازاريانى ۇيرەنۋ، جەتە يگەرۋ، يدەيانىڭ شىنايى ءمانىن يگەرۋ. جاس كادرلار ماركسيزمنىڭ نەگىزگى قاعيدالارىن، اسىرەسە، جاڭا داۋىردەگى پارتيانىڭ جاڭالىق اشۋ نازارياسىنىڭ جەتىستىكتەرىن قاجىرلىلىقپەن زەرتتەپ، وندا قامتىلعان تۇرعى، كوزقاراس، ءادىس، قاعيدانى، فيلوسوفيالىق زاڭدىلىقتى قۇلشىنا يگەرىپ، ءسوزدىڭ ءمانىن ءتىپتى دە ىشكەرىلەي ۇعىنۋى، ءسوزدىڭ ايتىلۋ سەبەبىن ءتىپتى دە ىشكەرىلەي ءبىلۋى كەرەك. پارتيانىڭ نازاريادا جاڭالىق اشۋ جەتىستىكتەرىن ىشكەرىلەي ۇيرەنىپ، ىلگەرىندى - كەيىندى ساباقتاستىرىپ ۇيرەنىپ، دەر كەزىندە ىلەسە ۇيرەنىپ، پارتيانىڭ عىلمي نازارياسىنان پايدالانىپ يدەيالىق ءادىستى ساپالىلاندىرىپ، يدەيالىق داعدارىستى شەشىپ، ءوزىنىڭ يدەيالىق ستيلى مەن رۋحاني كۇيىن قاداعالاپ، دۇنيەگە، ومىرگە، قۇنعا جانە ۇقىققا، قىزمەت ناتيجەسىنە، ىسىنە دۇرىس كوزقاراس ورناتىپ، ءوزىنىڭ ويلاۋ ءتاسىلى مەن رۋحاني دۇنيەسىن ىستەردىڭ دامۋ قاجەتىنە اناعۇرلىم ويداعىداي ۇيلەستىرۋ كەرەك. شىندىقتى ءىس جۇزىنەن ىزدەۋدە، شىندىققا جۇگىنىپ، ناقتى ءىس ىستەۋدە تاباندى بولىپ، ءىس پەن قىزمەتتى ءىس جۇزىندىكتى شىعار ءتۇيىن ەتە وتىرىپ جوبالاپ، العا قويىلعان ءادىس، ساياسات، جوبانىڭ ءىس جۇزىندىك جاعدايعا، وبيەكتيۆ زاڭدىلىققا، عىلمي رۋحقا ۇيلەسۋىنە مۇمكىندىك جاساپ، پارتيا ورتالىق كوميتەتىنىڭ شەشىم، ورنالاستىرۋلارىن جاسامپازدىقپەن قىزمەت ىستەۋ ارقىلى ناقتى تياناقتاندىرۋ كەرەك. شىنايى يگەرىپ، ناقتى ىستەۋدە، تياناقتاندىرۋدى مىقتى يگەرۋدە تاباندى بولىپ، بارلىق قىزمەتتى ناقتى ىستەۋ، ناقتى ونىمدىلىككە قول جەتكىزۋ، قول جەتپەسكە قول سوزباۋ، ءىس جۇزىندىكتەن قول ۇزبەۋ، فورماشىلدىقتان، تورەشىلدىكتەن بارىنشا ساقتانۋ كەرەك. شىنايى ادام بولۋدى، شىن سويلەۋدى، شىنايى ءىس ىستەۋدى ومىرلىك سەنىم ەتۋ كەرەك، سوندا عانا شىنايى ورنىقتى، باياندى بولۋعا بولادى.

  شي جينپيڭ بىلاي دەپ دارىپتەدى: حالىق − پارتيامىزدىڭ كۇش قاينارى، پارتيامىزدىڭ ىرگە تاسى حالىقتا، قان تامىرى حالىقتا، ءسوز جوق، حالىقتى كوڭىلدەگى ەڭ جوعارى ورىنعا قويىپ، قاشان دا بۇقارانىڭ قامىن ويلاۋ كەرەك. كوممۋنيستىك پارتيانىڭ كادرلارى «بۇقارانىڭ قىزمەتكەرى» بولۋدان جازباي، ءوزىن دە بۇقارا دەپ ءبىلۋى، ءمانساپتى بولدىم دەپ ءوزىن تورە ساناماۋى كەرەك، بۇل جاعىندا جاس كادرلار اۋەل باستان - اق انىق ويلاۋى، ونىڭ ۇستىنە ونى ءومىر بويى ەستە بەرىك ساقتاۋى كەرەك. جاس كادرلار مەيلى كىسىلىك تۇرمىستا بولسىن، الدە بيلىك جۇرگىزۋدە بولسىن، ەڭ اۋەلى، «مەن كىممىن، كىم ءۇشىن ىستەيمىن، كىمگە سۇيەنەمىن» دەگەن ماسەلەنى ويداعىداي شەشىپ، «مەن وزىممەن ساناسپاي حالىقتىڭ ءۇمىتىن اقتايمىن» دەيتىن رۋحاني دەڭگەيگە ۇزدىكسىز تالپىنۋى كەرەك. حالىقتى ۇستاز تۇتىپ، «باستاۋىش مەكتەپ وقۋشىسى» بولۋعا پەيىل بولۋ، وتە - موتە جۇرەك ءسوزىن ايتا الاتىن نەگىزگى ساتىداعى دوستاردى كوبىرەك تابۋ كەرەك، سوندا عانا ناقتى جاعدايدى تۇسىنۋگە، قىزمەتتى ويداعىداي ىستەۋگە ءتيىمدى بولادى. پارتيامىزدىڭ حالىقتىڭ باقىتىن كوزدەۋ، ۇلتتىڭ گۇلدەنۋىن كوزدەۋ سىندى اۋەلگى ماقساتىن، بورىشىن ەستە بەرىك ساقتاپ، پارتيانىڭ بۇكىل ىنتا - پەيىلىمەن حالىق ءۇشىن قىزمەت ىستەۋ ءتۇبىرلى ماقساتىندا باستان - اياق تاباندى بولىپ، بۇقارا «اسىعىپ وتىرعان، قينالىپ وتىرعان، ۋايىمداپ وتىرعان، كۇتىپ وتىرعان» ماسەلەلەردى دەن قويا، سۇيىسپەنشىلىكپەن، كۇش سالا شەشىپ، بۇقارانى اناعۇرلىم كوپ، اناعۇرلىم تىكە، اناعۇرلىم شىنايى تابىس، باقىت، حاۋىپسىزدىك سەزىمىنە كەنەلتۋ كەرەك.

  شي جينپيڭ مىنالاردى اتاپ كورسەتتى: ءبىز كوممۋنيستەردىڭ ءوز - وزىنە سىن ورىستەتۋىنىڭ ءتۇبىرلى قوزعاۋشى كۇشى پارتيالىلىقتان، پارتيا مەن حالىق ىستەرىنە وسكەلەڭ جاۋاپتى بولۋ رۋحىنان كەلەدى. جاس كادرلار «جاۋاپكەرلىكتى باسقالارعا ارتا بەرمەيتىن، وزىنە قاتاڭ تالاپ قوياتىن» سانالىلىقتى قالىپتاستىرۋى، ۇنەمى پارتيانىڭ نازارياسىمەن، پارتيا ۋستاۆىمەن، پارتيا قاعيداسىمەن، پارتيا تارتىبىمەن، اۋەلگى ماقساتپەن، بورىشپەن، پارتيا ورتالىق كوميتەتىنىڭ ورنالاستىرۋلارىمەن، تالاپتارىمەن سالىستىرىپ، ءوز كەمشىلىكتەرى مەن جەتەرسىزدىكتەرىن ىرىقتىلىقپەن ىزدەپ تابۋى، باتىلدىقپەن تۇزەتۋى كەرەك. پارتياعا، ىسكە، جولداستارعا وسكەلەڭ جاۋاپتى بولۋ رۋحى بويىنشا باتىلدىقپەن سىن ايتىپ، جولداستاردىڭ كەمشىلىكتەرىن بايقاۋىنا، قاتەلىكتەرىن تۇزەتۋىنە كومەكتەسىپ، جولداستارمەن ىنتىماقتاسىپ، بىرگە العا باسۋ كەرەك. سىندى كىشپەيىلدىكپەن قابىلداۋ پەيىلى مەن جىگەرىن جەتىلدىرىپ، كەڭ پەيىل بولىپ، شىن ىقىلاسپەن قابىلداپ، بار بولسا تۇزەتۋ، جوق بولسا ساقتانۋ كەرەك.

  شي جينپيڭ بىلاي دەپ دارىپتەدى: باتىلدىقپەن كۇرەس جۇرگىزۋ − پارتيامىزدىڭ ايقىن قاسيەتى. پارتيامىز كۇرەسكە سۇيەنىپ بۇگىنگى كۇنگە جەتكەن ەكەن، كۇرەسكە سۇيەنىپ بولاشاققا دا، ءسوز جوق، قول جەتكىزەدى. جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىن باستاپ، جاڭا دامۋ كەزەڭىن تياناق ەتىپ، جاڭا دامۋ ۇستانىمىن دايەكتىلەندىرىپ، جاڭا دامۋ جاعدايىن قالىپتاستىرۋدا ءدوپ كەلگەن حاۋىپ - قاتەر مەن سىن - سىناق بۇرىنعىدان تيتتەي دە كەم بولمايدى. جاس كادرلار كۇرەس بارىسىندا شىنىعۋدى سانالى تۇردە كۇشەيتىپ، كۇرەس بارىسىندا كۇرەس جۇرگىزۋدى ۇيرەنىپ، كۇرەس بارىسىندا ەسەيىپ - ەرجەتىپ، جوعارىلاپ، كۇرەس جۇرگىزۋگە باتىل، كۇرەس جۇرگىزۋگە شەبەر باتىرلار بولۋعا قۇلشىنۋى كەرەك. كۇرەس جىگەرىن بەكەمدەپ، قايىسپاس قايسارلىق كورسەتىپ، العان بەتتەن قايتپاۋ، ساتسىزدىككە تاپ بولعاندا تيتتەي دە جاسقانباۋ، قيىنشىلىققا جولىققاندا، استە، شەگىنبەۋ كەرەك. كۇرەس جۇرگىزۋ شەبەرلىگىن جەتىلدىرىپ، بولماشى ىستەردى دە ءبىلۋ قابىلەتىن جوعارىلاتىپ، قۇبىلىستان ءوتىپ مانىنە كوز جىبەرىپ، وزگەرىستى دۇرىس تانىپ، وزگەرىسكە عىلمي توتەپ بەرىپ، ىرىقتىلىقپەن وزگەرىسكە ۇمتىلىپ، ورايدى بارلاپ، تيىمدىلىككە ۇمتىلىپ، زياننان ساقتانۋ كەرەك. ستراتەگيالىق جوسپارلاۋدى كۇشەيتىپ، جالپى اۋقىم مەن جالپى جاعدايدى يگەرىپ، باستى قايشىلىق پەن قايشىلىقتىڭ باستى جاعىن مىقتى يگەرىپ، ماڭىزدى - ماڭىزسىزىن، شۇعىل - شۇعىل ەمەسىن ايقىن ايىرىپ، ارميانى عىلمي تۇردە ورنالاستىرىپ، كۇرەستىڭ ىرىقتىلىعىن مىقتاپ يگەرۋ كەرەك. تومەنگى شەكتە ويلاۋدى كۇشەيتىپ، حاۋىپ - قاتەر فاكتورلارىن مەرزىم بويىنشا جاپپاي تەكسەرۋ كەرەك. ءبىر ىستەن ءبىر وي تۇيۋدە شەبەر بولىپ، ودان ارعىسىن ءتىپتى دە تىندىرىمدى ىستەپ، بىرەۋى ارقىلى وزگەسىن تۇسپالداپ، كۇرەس جۇرگىزۋدەگى ناعىز ىسكەرلىكتى، ناعىز قابىلەتتى جەتىلدىرۋ كەرەك.

  شي جينپيڭ بىلاي دەپ اتاپ كورسەتتى: جاس كادرلار قاجىرلىلىقپەن كۇرەس جۇرگىزۋدىڭ ۇتىلامالى تاياقشاسىن تاپسىرىپ الىپ، العان بەتىنەن قايتپايتىن كۇرەسكەرلىك بەينەمەن جانە ماڭگى بويكۇيەزدىككە سالىنبايتىن رۋحاني كۇيمەن اۋىر مىندەتتى باتىلدىقپەن ارقالاپ، قاجىرلىلىقپەن ناقتى ىستەپ، جاڭا ءداۋىردىڭ جاڭا جورىعىندا پارتيانىڭ، وتاننىڭ ءۇمىتىن اقتايتىن كۇرەس ىزدەرىن قالدىرۋى كەرەك. ۇنەمشىل، قاراپايىم بولۋ، استا - توك ىسىراپشىلدىقتان بارىنشا ساقتانۋ − پارتيامىزدىڭ اسىل مۇراسى. قازىر ءبىزدىڭ تۇرمىس جاعدايىمىز جاقساردى، ءبىراق قاجىرلىلىقپەن كۇرەس جۇرگىزۋ رۋحىمىز تيتتەي دە كەم بولسا بولمايدى، ءسوز جوق، ۇنەمشىلدىكپەن ءوزىن جەتىلدىرۋدە، ۇنەمشىلدىكپەن كاسىپتى گۇلدەندىرۋدە، ۇنەمشىل بولۋدا، بارلىق ءىستى ۇقىپتىلىقپەن، ۇنەمشىلدىكپەن ىستەۋدە تاباندى بولۋ كەرەك. جاس كادرلار وزدەرىن قاي - قاشان دا سەرگەك ۇستاپ، بەلسەندى، اقاۋسىز تۇرمىس اۋەسىن جەتىلدىرىپ، راقاتقۇمارلىققا، استا - توك ىسىراپشىلدىققا باتىل قارسى تۇرىپ، كوممۋنيستەردىڭ پاك، كىرشىكسىز ساياسي قاسيەتىن ماڭگى ساقتاۋى كەرەك.

  چىن شي وقۋ باستاۋ سالتىن باسقاردى، ول مىنانى ءبىلدىردى: شي جينپيڭ جاڭا ءداۋىر جۇڭگوشا سوتسياليزم يدەياسىن ىشكەرىلەي ۇيرەنىپ، ونى پارتيا تاريحىن، جاڭا جۇڭگو تاريحىن، رەفورما جاساۋ، ەسىك اشۋ تاريحىن، سوتسياليزمنىڭ دامۋ تاريحىن ۇيرەنۋمەن ساباقتاستىرىپ، پارتيانىڭ جاڭالىق جاراتۋ نازارياسىنىڭ اقيقات كۇشىن، امالياتتىق كۇشىن، ادامگەرشىلىك كۇشىن تەرەڭ ءتۇسىنىپ، ساياسي تۇجىرىم جاساۋ قابىلەتىن، ساياسي سانالىلىقتى، ساياسي اتقارۋ قابىلەتىن ۇزدىكسىز جوعارىلاتىپ، پارتيانىڭ داڭقتى ءداستۇرى مەن تاڭداۋلى ستيلىن ۇيرەنۋ جانە ساۋلەلەندىرۋ سىندى ساياسي سانالىلىقتى، يدەيالىق سانالىلىقتى، ارەكەت سانالىلىعىن شىنايى كۇشەيتۋ كەرەك. جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا قاجىماي - تالماي كۇرەس جۇرگىزىپ، پارتيا قۇرىلعانىنىڭ 100 جىلدىعىن ەرەن ناتيجەلەرمەن قارسى الۋ كەرەك.

  ديڭ شۋەشياڭ، حۋاڭ كۇنميڭ وقۋ باستاۋ سالتىنا قاتىناستى.

  2021 - جىلعى كوكتەمگى وقۋ ماۋسىمىنداعى ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسىنىڭ كۋرسانتتارى وقۋ باستاۋ سالتىنا قاتىناستى، ورتالىقتىڭ قاتىستى تاراۋلارىنداعى جاۋاپتى جولداستار وقۋ باستاۋ سالتىنا سىرتتاي قاتىناستى.