شي جينپيڭ چاۋشياننىڭ اقپارات قۇرالدارىندا اۆتورلى ماقالا جاريالادى
جۇڭگو - چاۋشيان دوستىعىن جالعاستىرىپ، ءداۋىردىڭ جاڭا تاراۋىن ۇزدىكسىز جازايىق
چاۋشيان دەموكراتيالىق حالىق رەسپۋبليكاسىندا مەملەكەت ىستەرى ساپارىندا بولۋ قارساڭىندا، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ چاۋشياننىڭ «ەڭبەك اقپاراتى» قاتارلى باستى اقپارات قۇرالدارىندا «جۇڭگو - چاۋشيان دوستىعىن جالعاستىرىپ، ءداۋىردىڭ جاڭا تاراۋىن ۇزدىكسىز جازايىق» دەگەن تاقىرىپتا اۆتورلى ماقالا جاريالادى. ماقالا تومەندەگىدەي:
جۇڭگو - چاۋشيان دوستىعىن جالعاستىرىپ، ءداۋىردىڭ جاڭا تاراۋىن ۇزدىكسىز جازايىق
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، جۇڭحۋا حالىق رەسپۋبليكاسىنىڭ ءتوراعاسى
شي جينپيڭ
بيىل جۇڭگو مەن چاۋشياننىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى. وسى تاريحي ساتتە چاۋشيان ەڭبەك پارتياسىنىڭ كوميتەت باستىعى، مەملەكەت ىستەرى كوميتەتىنىڭ باستىعى جين جىڭىن جولداستىڭ ۇسىنىسىمەن، ”دوستىقتى جالعاستىرۋ، جاڭا تاراۋدى ۇزدىكسىز جازۋ“ سىندى تاماشا تىلەكپەن تاياۋدا چاۋشيان دەموكراتيالىق حالىق رەسپۋبليكاسىندا مەملەكەت ىستەرى ساپارىندا بولامىن.
سول جىلداردى ەسكە الساق، ەكى پارتيانىڭ، ەكى ەلدىڭ اعا بۋىن باسشىلارى ورتاق مۇرات - سەنىممەن جانە تەرەڭ توڭكەرىستىك دوستىقپەن جۇڭگو مەن چاۋشياننىڭ ءداستۇرلى دوستىعىن قول ۇستاسا تۇلعالاپ، بىزگە ورتاق باعالى بايلىق قالدىرعان ەدى. جۇڭگو مەن چاۋشياننىڭ نەشە بۋىن باسشىلارى تىعىز قارىم - قاتىناستى ساقتاپ، جۇڭگو مەن چاۋشياننىڭ ءداستۇرلى دوستىعىن جالعاستىرۋ، ەكى ەل حالىقتارىن باقىتقا كەنەلتۋ جولىندا ىشكەرىلەي قارىم - قاتىناس ورناتىپ، ىزگى نيەتپەن سەلبەسىپ، حالىقارالىق قارىم - قاتىناس تاريحىندا تاماشا داستان جازدى.
ۇزاق ۋاقىتتان بەرى، جۇڭگو مەن چاۋشيان ەكى پارتيانىڭ پارمەندى باسشىلىعىندا، مەيلى سىرتتىڭ شاپقىنشىلىعىنا بىرگە قارسى تۇرۋ، مەملەكەتتىڭ تاۋەلسىزدىگى مەن ۇلت ازاتتىعىنا قول جەتكىزۋ كۇرەسىندە بولسىن، مەيلى سوتسياليستىك توڭكەرىس پەن قۇرىلىس ىستەرىن ورىستەتۋدە بولسىن، ەكى ەل حالىقتارى ءبىر - بىرىنە سەنىپ، ءبىرىن - ءبىرى قولداپ، ءوزارا كومەكتەسىپ، تەرەڭ دوستىق سۇيىسپەنشىلىك ورناتتى، ”ۋاقىت وتكەن سايىن نىعايىپ، التىننان قىمباتتى بولا ءتۇستى“ دەۋگە بولادى.
تۋىس تۋىسىم جاقسى بولسىن دەيدى، كورشى كورشىم جاقسى بولسىن دەيدى. جاقسى جولداس، جاقسى كورشى رەتىندە، حالىقارالىق اۋقىم قالاي وزگەرسە دە جۇڭگو پارتياسى مەن ۇكىمەتىنىڭ جۇڭگو مەن چاۋشياننىڭ دوستىق سەلبەستىك قاتىناسىن نىعايتۋ، دامىتۋ تاباندى تۇرعىسى وزگەرگەن جوق ءارى وزگەرمەيدى، جۇڭگو جاق كوميتەت باستىعى جين جىڭىننىڭ چاۋشيان پارتياسى مەن حالقىن باستاپ جاڭا ستراتەگيالىق لۋشياندى دايەكتىلەندىرىپ، تياناقتاندىرىپ، زەيىن - زەردەنى شوعىرلاندىرا وتىرىپ ەكونوميكانى دامىتىپ، حالىق تۇرمىسىن جاقسارتىپ، چاۋشياننىڭ سوتسياليستىك قۇرىلىسىنىڭ جاڭا اناعۇرلىم زور تابىستارعا جەتۋىن ىلگەرىلەتۋىن تاباندىلىقپەن قولدايدى.
جۇڭگو، چاۋشيان ەكى ەل جانە ەكى ەل حالىقتارى قيىن - قىستاۋ ماشاقاتتى كۇندەردى باستان وتكەرگەن، بەيبىتشىلىكتىڭ قانشاما قاستەرلى ەكەنىن ابدەن بىلەدى. ءبىز كوميتەت باستىعى جين جىڭىننىڭ دۇرىس شەشىمى مەن قاتىستى جاقتاردىڭ بىرگە قۇلشىنۋىنىڭ ناتيجەسىندە، تۇبەكتىڭ بەيبىت تىلدەسۋىنىڭ ۇلكەن اۋقىمى قالىپتاسقانىن، تۇبەك ماسەلەسىن ساياسي جولمەن شەشۋ تاپتىرماس تاريحي ورايعا ءدوپ كەلىپ، حالىقارالىق قوعامنىڭ جاپپاي قۇپتاۋىنا يە بولعاندىعىن جانە ءتورت كوزبەن كۇتىپ وتىرعاندىعىن قۋانا كورىپ وتىرمىز. جۇڭگو جاق چاۋشياندىق جولداستارمەن قول ۇستاسا قۇلشىنىپ، ءوڭىردىڭ باياندى تىنىشتىعى ۇلى جوسپارىن جۇزەگە اسىرۋعا بىرگە ۇمتىلۋدى قالايدى.
70 جىل قيىن - قىستاۋ كۇندەردە بىرگە بولدى، 70 جىل ەكپىندەي العا ىلگەرىلەدى. مەن جانە كوميتەت باستىعى جين جىڭىن ەكەۋىمىزدىڭ بىرگە جەتەكتەۋىمىز بەن ىلگەرىلەتۋىمىزدە، 70 جىل شۇعىلالى تاريحي بارىستى باسىپ وتكەن جۇڭگو - چاۋشيان قارىم - قاتىناسى جاڭا تاريحي بەلەسكە شىعىپ، جاڭا جالىندى ومىرشەڭ كۇشىن قاۋلاتتى. ءبىزدىڭ اعا بۋىنداردىڭ داڭقتى داستۇرىنە مۇراگەرلىك ەتىپ، ءداۋىر دامۋىنىڭ تالابى جانە ەكى ەل حالىقتارىنىڭ ورتاق ارمان - تىلەگى بويىنشا جۇڭگو - چاۋشيان دوستىعىنىڭ جاڭا تاراۋىن ۇزدىكسىز جازىپ، ەكى ەل قارىم - قاتىناسىنىڭ جاڭا داۋىردە تىڭنان دامۋىن ىلگەرىلەتىپ، ەكى ەل حالىقتارىن اناعۇرلىم ويداعىداي باقىتقا كەنەلتىپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگىن، ورنىقتىلىعىن، گۇلدەنۋىن جەبەۋگە سەنىمىمىز دە، قابىلەتىمىز دە بار.
سوندىقتان، مەن وسى جولعى ساپارىم ارقىلى كوميتەت باستىعى جين جىڭىنمەن جانە چاۋشياندىق جولداستارمەن بىرگە جۇڭگو مەن چاۋشياننىڭ دوستىق سەلبەستىك قارىم - قاتىناسىن جوبالاپ، جۇڭگو مەن چاۋشياننىڭ ءداستۇرلى دوستىعىنىڭ جاڭا تاراۋىن جازۋدى قالايمىن.
− ستراتەگيالىق بايلانىس جانە اۋىس - كۇيىس جاساپ، ءوزارا ۇلگى الۋدى كۇشەيتىپ، جۇڭگو مەن چاۋشياننىڭ ءداستۇرلى دوستىعىنا جاڭا ءمان ۇستەۋ. جوعارى جىكتەگىلەر قارىم - قاتىناسىنىڭ تاڭداۋلى ءداستۇرىن جانە جەتەكتەۋ رولىن ساۋلەلەندىرىپ، جۇڭگو - چاۋشيان قارىم - قاتىناسىنىڭ دامۋ جوباسىن ويداعىداي جاساپ، جۇڭگو - چاۋشيان قارىم - قاتىناسىنىڭ دامۋ بەتالىسىن ويداعىداي يگەرۋ. ءار جىكتەگى قارىم - قاتىناس پەن سايكەسۋدى كۇشەيتىپ، پارتيالار ارا اۋىس - كۇيىس پەن ەل باسقارۋ تاجىريبەلەرىن ءوزارا قابىلداۋدى كۇشەيتىپ، ءوز پارتيالارىمىز بەن ەلدەرىمىزدىڭ ىستەرىن ويداعىداي جالعاستىرۋ، دامىتۋ.
− دوستىق قارىم - قاتىناس پەن ناقتى سەلبەستىكتى كۇشەيتىپ، جۇڭگو - چاۋشيان قارىم - قاتىناسىنىڭ دامۋىنا جاڭا قوزعاۋشى كۇش ۇستەۋ. اقىلداسىپ بەلگىلەنگەن سەلبەستىك نىساندارىن ويداعىداي تياناقتاندىرىپ، ەكى ەلدىڭ حالىقتار اراسىنداعى دوستىق بارىس - كەلىسىن كەڭەيتىپ، وقۋ - اعارتۋ، مادەنيەت، دەنە تاربيە، ساياحات، جاستار، جەرگىلىكتى ورىندار، حالىق تۇرمىسى سياقتى سالالارداعى بارىس - كەلىس، سەلبەستىك اياسىن كەڭەيتىپ، ەكى ەلدىڭ دامۋ ىستەرىنە قىزمەت ەتىپ، ەكى ەل حالىقتارىنىڭ ىرىس - قۇتىن مولايتىپ، جۇڭگو - چاۋشيان دوستىعىن ۇرپاقتان − ۇرپاققا جالعاستىرۋ، ماڭگى كوركەيتۋ.
− قارىم - قاتىناستى، تىلدەسۋدى جانە سايكەسۋدى، سەلبەسۋدى كۇشەيتىپ، ءوڭىردىڭ بەيبىتشىلىگى مەن ورنىقتىلىعىنىڭ جاڭا جاعدايىن اشۋ. تۇبەك ماسەلەسىن ساياسي جولمەن شەشۋ ءۇردىسىن ىلگەرىلەتىپ، تۇبەكتىڭ بەيبىتشىلىگىن، ورنىقتىلىعىن قورعاۋ ەكى ەلدىڭ وزدەرىنىڭ دامۋ قاجەتىنە جانە ەكى ەل حالىقتارىنىڭ ورتاق مۇددەسىنە ۇيلەسەدى. جۇڭگو جاق چاۋشيان جاقتىڭ تۇبەك ماسەلەسىن شەشۋدىڭ دۇرىس بەتالىسىنا تاباندى بولۋىن قولدايدى، چاۋشيان جاقتىڭ ءجىتى قاداعالاپ وتىرعان ۇيلەسىمدى ىستەرىن تىلدەسۋ ارقىلى شەشۋىن قولدايدى، چاۋشيان جاقپەن، سونداي - اق قاتىستى جاقتارمەن بايلانىستى، سايكەسۋدى كۇشەيتىپ، تۇبەك ماسەلەسى جونىندەگى تىلدەسۋدىڭ، كەڭەسۋدىڭ ىلگەرىلەۋشىلىككە قول جەتكىزۋىن بىرگە ىلگەرىلەتىپ، ءوڭىردىڭ بەيبىتشىلىگى مەن ورنىقتىلىعىنا جانە دامۋى مەن گۇلدەنۋىنە بەلسەنە ۇلەس قوسۋدى قالايدى.
”ءبىزدىڭ ۇلى دوستىعىمىز، ءبىزدىڭ ورتاق مۇراتىمىز ءبىزدىڭ ىنتىماعىمىزدى شەكسىز نىعايتادى“. بەينە ”جۇڭگو - چاۋشيان دوستىق جىرى“ندا ايتىلعانداي، حالىقارالىق اۋقىم قالاي وزگەرسە دە ەكى پارتيامىز، ەكى ەلىمىز جانە ەكى ەل حالىقتارىمىز جۇڭگو مەن چاۋشياننىڭ ءداستۇرلى دوستىعىن ويداعىداي جالعاستىرۋى، ساۋلەلەندىرۋى كەرەك. ءبىز چاۋشياندىق جولداستارمەن بىرگە ءداستۇردى جالعاستىرىپ، بولاشاققا بەت الىپ، جۇڭگو - چاۋشيان قارىم - قاتىناسىنىڭ جاڭا داۋىردە تولقىن جارا العا باسۋىن ىلگەرىلەتۋدى قالايمىز.
مەن جۇڭگو - چاۋشيان دوستىعى سىندى اسپانمەن تىلدەسكەن الىپ بايتەرەكتىڭ، ءسوز جوق، ماۋەلەپ ءوسىپ، ماڭگى جاپ - جاسىل بولىپ تۇراتىندىعىنا كامىل سەنەمىن!
