جۋىرداعى جىلداردان بەرى، ەلىمىزدە جۇرەك بۇلشىق ەتىنىڭ ولەتتەنۋى اۋرۋىنىڭ تۋىلۋ مولشەرى كورنەكتى كوبەيىپ، قوعامداعىلاردىڭ نازارىن بارىنشا اۋداردى. جۇرەك بۇلشىق ەتىنىڭ ولەتتەنۋى دەگەن نە؟ جاي تىلمەن ايتقاندا، ايدارشا ارتەريا توسىلىپ، قاننىڭ قالىپتى اينالىسقا تۇسە الماۋى سەبەبىنەن جۇرەك بۇلشىق ەتىنە قان، وتتەگى جەتىسپەۋدى كورسەتەدى.
ساناق مالىمەتىنەن قاراعاندا، جۇرەك بۇلشىق ەتىنىڭ ولەتتەنۋى ورتا جاستاعىلار مەن قارتتاردا وڭاي تۋىلادى، الايدا، جۋىرداعى جىلداردان بەرى، بۇل اۋرۋ جاستار اراسىندا دا كورنەكتى مولايىپ، مۇگەدەكتىككە شالدىقتىرۋ، ولىمگە دۋشار ەتۋ مولشەرى ءبىرشاما جوعارىلادى. ءارقانداي اۋرۋدى دا بارىنشا ەرتە بايقاپ، ەرتە ەمدەلۋ كەرەك. شۇعىل حارەكتىرلى جۇرەك بۇلشىق ەتىنىڭ ولەتتەنۋىنىڭ بارىسى تەز بولادى، اۋرۋ بايقالسا بولدى اۋىر دارەجەدە بولادى، سوندىقتان، ونىڭ باستاپقى كەزدەگى بەلگىلەرىن ەرتە بايقاۋ كەرەك. جۇرەك شانشۋى ۇنەمى تۋىلاتىن نەمەسە جۇرەك شانشۋى العاش رەت تۋىلعان ناۋقاستار دەر كەزىندە ەمحاناعا بارىپ ەمدەلۋى كەرەك.
كلينيكادا شۇعىل حارەكتىرلى جۇرەك بۇلشىق ەتىنىڭ ولەتتەنۋىنە شالدىققان ناۋقاستاردىڭ كوبى دەر كەزىندە ەمدەلسە، اۋرۋدىڭ ونان ارى اسقىنۋىنان ءونىمدى تۇردە ساقتانۋعا بولادى. شۇعىل حارەكتىرلى جۇرەك بۇلشىق ەتىنىڭ ولەتتەنۋىنە شالدىققان ناۋقاستاردىڭ كوبىندە ءبىرقىدىرۋ اۋرۋ بەلگىلەرى بايقالادى، الايدا، ۇقساماعان ناۋقاستاردا بايقالاتىن اۋرۋ بەلگىلەرى دە ۇقسامايدى. جالپى جاقتان ايتقاندا، مۇنىڭ بەلگىسى تيپتىك جانە تيپتىك ەمەس دەگەن ەكى توپقا بولىنەدى. مۇندا، شۇعىل حارەكتىرلى جۇرەك بۇلشىق ەتىنىڭ ولەتتەنۋىنە شالدىققانداردىڭ شامامەن %30 ىندە تيپتىك ەمەس اۋرۋ بەلگىلەرى بايقالادى، مۇنداي جاعدايدا ناۋقاس بەلگىلەرىن شۇعىل حارەكتىرلى جۇرەك بۇلشىق ەتىنىڭ ولەتتەنۋىمەن تىكەلەي بايلانىستىرۋ قيىن.
شۇعىل حارەكتىرلى جۇرەك ەتىنىڭ ولەتتەنۋى تۋىلىپ، ناۋقاس ادام كورنەكتى تۇردە جايسىزدانسا، 120 شۇعىل قۇتقارۋ تەلەفونىنا دەرەۋ تەلەفون جالعاۋ كەرەك. 120 شۇعىل قۇتقارۋ ماشيناسى كەلەردەن بۇرىن، قۇتقارۋشىلار ناۋقاستى تىنىش جاتقىزۋى، قايتا – قايتا قوزعاماۋى كەرەك، اۋرۋدى باساتىن دارىلەردى دە الباتى ىشكىزۋگە بولمايدى. ناۋقاستى جاي ورنالاستىرعاننان كەيىن، ەگەر جۇرەك سوعۋى تۇتقيىل توقتاۋ نەمەسە ەس – تۇسىن بىلمەۋ سياقتى جاعدايلار بايقالسا، قۇتقارۋشىلار دەرەۋ ناۋقاسقا جۇرەك – وكپە قىزمەتىن قايتا جانداندىرۋ ارەكەتىن ىستەۋى كەرەك.
ءتاج ارتەرياسى سيپاتىندىق جۇرەك اۋرۋلارىنا شالدىقتىراتىن حاۋىپتى فاكتورلار، ۇقساس، شۇعىل حارەكتىرلى جۇرەك بۇلشىق ەتى ولەتتەنۋىنىڭ دە حاۋىپتى فاكتورى سانالادى، مىسالى، قانداعى ماي قۇرامىنىڭ جوعارى بولۋى، جوعارى قان قىسىمى، تەمەكى شەگۋ، ارەكەتتىڭ ازدىعى، سەمىزدىك، قانتتى نەسەپ اۋرۋى قاتارلىلار. سوندىقتان، تۇرمىس ادەتىن قۇلشىنا جاقسارتۋ، نەگىزدىك اۋرۋلاردى بەلسەندى ەمدەتۋ كەرەك. ۇيلەسىمدى ازىقتانۋ، وتە مايلى، تۇزدى تاعامداردى از تۇتىنۋ، جەمىس – جيدەك، قاۋىن – قاربىز، كوكونىستەردى كوپ جەۋ كەرەك؛ ۇيلەسىمدى ارەكەتتەنىپ، تەمەكى مەن اراقتى قويۋ، ۇيقىنىڭ ساپاسىنا كەپىلدىك ەتۋ كەرەك؛ جوعارى قان قىسىمى، قانداعى ماي قۇرامىنىڭ جوعارى بولۋى، قانداعى قانت قۇرامىنىڭ جوعارى بولۋى قاتارلىلاردى بەلسەندى تەجەپ، مەرزىم سايىن دەنساۋلىق تەكسەرتىپ وتىرۋعا كوڭىل ءبولىپ، وزگەشە جاعداي بايقالسا دەر كەزىندە ەمدەلۋ كەرەك.
http://kazakh.people.com.cn/15835347.html
