تيانجين دەنساۋلىق ساقتاۋ – سالاماتتىق كوميتەتىنىڭ مالىمەتىنە قاراعاندا، 11 – ايدىڭ 7 – كۇنى ساعات 18 دەن 11 – ايدىڭ 8 – كۇنى ساعات 8 گە دەيىن جاڭادان ءبىر ناۋقاستىڭ دياگنوزى تۇراقتاندىرىلعان، بۇل ناۋقاس تيانجين حايليان توڭازىتىلعان ازىق – تۇلىكتەر شەكتى سەرىكتەستىگىنىڭ تيەۋ – ءتۇسىرۋ جۇمىسىنا جاۋاپتى جۇمىسكەرى ەكەن. وزگە اقپارات قۇرالدارىنىڭ حابارلاۋىنشا، بىرنەشە جەردەگى توڭازىتىلعان ازىق – تۇلىك ونىمدەرىنىڭ قورابىنداعى نۋكلەين قىشقىلىنا تەكسەرۋ جۇرگىزگەندە، ناتيجەسى بولىمدى بولىپ شىققان. ەندەشە، ءبىز كۇندەلىكتى تۇرمىستا قايتكەندە توڭازىتىلعان ازىق – تۇلىكتەردەن حاۋىپسىز پايدالانا الامىز؟ بەيجيڭ قالالىق اۋرۋدان ساقتانۋ جانە ونى تىزگىندەۋ ورتالىعى ءۇش ءتۇرلى جاقتان ۇسىنىس بەردى.
ساتىپ العان كەزدە
1. شيكى ونىمدەردى سەنىمدى ەرەنبازار نەمەسە بازاردان ساتىپ العان ءجون، ساتىپ العان كەزدە، توڭازىتىلعان شيكى ونىمدەردى تاڭداۋ بارىسىندا قولعا ءبىر رەت قولدانىلاتىن سۋلياۋ قالتانى كيۋ قاجەت، ونىمدەردى قولمەن تىكەي ۇستاۋدان ساقتانۋمەن بىرگە، ماسكىنى دا دۇرىس تاققان ءجون.
2. قوراپتاعى توڭازىتىلعان شيكى ازىق – تۇلىكتەردى ساتىپ العان كەزدە، وندىرىلگەن ۋاقىتى، ساقتاۋ ۋاقىتى، ساقتاۋ شارت – جاعدايى قاتارلى ازىق – تۇلىك بەلگىسىندەگى مازمۇنعا نازار اۋدارىپ، ازىق – تۇلىكتىڭ ساقتاۋ ۋاقىتىنان ءوتىپ كەتپەگەنىنە كەپىلدىك ەتۋ كەرەك.
3. ساتىپ العاننان كەيىن، قوس قولدى سابىنمەن نەمەسە قول جۋۋ سۇيىقتىعىمەن تازالاپ جۋۋ قاجەت، قول جۋۋدان بۇرىن، قوس قولدى اۋىز، مۇرىن، كوز قاتارلى جەرلەرگە تيگىزۋگە بولمايدى.
4. شەكارا سىرتىنداعى مەملەكەتتەر مەن رايونداردىڭ تاۋارلارىن ينتەرنەت ارقىلى ساتىپ العاندا، باسقالارعا تاپسىرىس بەرۋ ارقىلى ساتىپ العاندا، شەكارا سىرتىنان توڭازىتىلعان ازىق – تۇلىك ساتىپ العاندا، كەدەننىڭ ازىق – تۇلىكتى تەكسەرۋ – كارەنتيندەۋ ينفورماتسيالارىنا نازار اۋدارۋ، سىرتقى قورابىن ويداعىداي ديزەنفەكسيالاۋ كەرەك.
تازالاعان، مانەرلەگەن كەزدە
1. اس ءۇي مەن قولدانىلاتىن بۇيىمداردىڭ تازالىعىن ساقتاۋ، ازىق – تۇلىك ماتەريالدارىن ءبىرجاقتىلى ەتۋدەن بۇرىن قول جۋۋ قاجەت.
2. ازىق - تۇلىكتىڭ پىسقاندارى مەن شيكىلەرىن ءبولىپ ساقتاۋعا كەپىلدىك ەتىپ، توڭازىتىلعان ازىق – تۇلىكتەردى ءبىرجاقتىلى ەتكەندە پايدالانعان ىدىستاردى، پىشاق جانە اس تاقتاي قاتارلى بۇيىمداردى ايىرىم قويۋ، دەر كەزىندە جۋۋ، ديزەنفەكسيالاۋ، تىكەلەي جەۋگە بولاتىن ازىق – تۇلىكتەردى ءبىرجاقتىلى ەتەتىن قۇرالدارمەن ارالاستىرۋدان ساقتانۋ، ايقاسپالى لاستانۋدان ساقتانۋ قاجەت.
3. توڭازىتىلعان ازىق – تۇلىكتەردى توڭازىتقىشتىڭ توڭازىتۋ بولمەسىنە ساقتاۋ كەرەك، ساقتاۋ ۋاقىتى وتە ۇزاق بولىپ كەتپەۋى كەرەك، پىسقانى مەن شيكىسىن ارالاستىرماي، ءبولىپ ساقتاۋ كەرەك.
4. توڭازىتىلعان شيكى ازىق – تۇلىكتەردى جۋعاننان كەيىن نەمەسە ولارعا قول تيگىزگەننەن كەيىن الدىمەن قولدى جۋىپ، ونان سوڭ بارىپ، پىسقان ازىق – تۇلىكتەرگە قول تيگىزۋگە بولادى.
5. اس ءۇيدىڭ اۋاسىن الماستىرىپ تۇرۋ جانە تازالىعىن ساقتاۋ قاجەت، قاجەت بولعاندا اس ءۇي ورتاسى مەن ىدىس – اياقتاردى، قازان – وشاقتى ديزەنفەكسيالاۋ قاجەت.
پىسىرعان جانە تۇتىنعان كەزدە
1. توڭازىتىلعان شيكى ازىق – تۇلىكتەردى پىسىرعان كەزدە نەمەسە تۇتىنعان كەزدە، تەڭىز ونىمدەرىن مانەرلەگەن كەزدە جانە پىسىرعان كەزدە، ابدەن پىسىرۋعا كەپىلدىك ەتكەن ءجون. ابدەن پىسىرۋدىڭ جاي پرينسيپى — قازان قايناعان سوڭ جالعاستى 10 – 15 مينۋت قايناتۋ.
2. تەڭىز ونىمدەرىن شيكى جەۋدەن، جارتىلاي شيكى جەۋدەن، اراققا، سىركە سۋىنا شىلاۋ ارقىلى نەمەسە تۇزداۋ ارقىلى تىكەلەي تۇتىنۋدان بارىنشا ساقتانۋ قاجەت.
3. ەكى نەمەسە ودان كوپ ادام بىرگە تاماقتانعان كەزدە، تاماق سالاتىن ايىرىم ساقپى، قاسىق قويۋ، ايقاسپالى جۇعىمدالۋدان ساقتانۋ، جۇقپالى اۋرۋلاردىڭ جانە ازىق – تۇلىك قاينارىندىق اۋرۋلاردىڭ تۋىلۋىنان ساقتانعان ءجون.
4. جەپ تاۋىسا الماعان (پىسىرىلعان سوڭ) تەڭىز ونىمدەرىن توڭازىتقىشتىڭ سالقىن ساقتاۋ بولمەسىنە ساقتاپ، تەزىرەك جەپ تاۋىسقان ءجون، قايتا تۇتىناتىن كەزدە ابدەن ىسىتىپ، تەمپەراتۋراسى ℃70 تان اسقان كەزدە بارىپ تۇتىنۋ كەرەك.
شاعىن ەسكەرتپە
توڭازىتىلعان ازىق – تۇلىكتەردى تۇتىنعان سوڭ، ەگەر قىزۋى ورلەۋ، ءىشى ءوتۋ جاعدايلارى بايقالسا، دەر كەزىندە قىزۋدى تەكسەرۋ امبۋلاتورياسىنا بارىپ ەمدەلۋ ءارى ازىق – تۇلىك تۇتىنعان ۋاقىت، ازىق – تۇلىكتىڭ ءتۇرى جانە كەلۋ قاينارى قاتارلى ينفورماتسيالاردى ىرىقتىلىقپەن ايتۋ، وسى ارقىلى دياگنوز قويۋ مەن ەمدەۋگە شارت – جاعداي جاراتۋ كەرەك.
http://kazakh.people.com.cn/155419/15829346.html
