جاز مەگىلىندە شىلىڭگىر ىستىق بولىپ، تەمپەراتۋرا ۇزدىكسىز جوعارىلايدى، ادام دەنەسىنەن تەر دە كوپ شىعادى، سۋدى دا بىرتىندەپ كوپ ىشۋگە تۋرا كەلەدى. كوپتەگەن جاستار ارەكەت اياقتاعان سوڭ نەمەسە جۋىنىپ بولعان سوڭ ستاكانداعى سۋدى قىلقىلداتىپ جۇتا سالادى. مۇنداي سۋ ءىشۋ ارەكەتى جاي ءىس سياقتى كورىنگەنىمەن، ەگەر سۋ ءىشۋ ءتاسىلى دۇرىس بولماسا، دەنساۋلىقتى كۇتىمدەۋ رولىن اتقارا الماعانىمەن قويماي، ومىرىڭىزگە دە حاۋىپ ءتوندىرۋى مۇمكىن.
سۋدى مولىنان ۇرتتاپ، اسىعىس ءىشۋ زياندى
بىرىنشىدەن، جۇرەك اۋرۋى بار ادامداردىڭ جۇرەك قىزمەتى كەمەلدى بولمايتىندىقتان، ەگەر سۋدى مول ۇرتتاپ ىشسە، سۋ قۇرامىنىڭ تەز ارادا قانعا وتۋىنە اپارىپ سوعادى، سۋ ىشەكتىڭ سىمىرۋىنەن وتكەن سوڭ، قان سۇيىلادى، قىسقا ۋاقىت ىشىندە اينالىمعا تۇسەتىن قاننىڭ مولشەرى كۇرت ارتادى دا، جۇرەك بۇلشىق ەتىنىڭ وتتەگىن سارىپ ەتۋ مولشەرىن وڭاي ارتتىرىپ، جۇرەكتىڭ كوتەرىمدىلىگىن اۋىرلاتادى. جەڭىل بولعاندا، كەۋدە جايسىزدانۋ، تىنىسى تارىلۋ جاعدايلارى بايقالسا، اۋىر بولعاندا شۇعىل حارەكتىرلى جۇرەك قالجىراۋىنا اپارىپ سوعۋى مۇمكىن.
ەكىنشىدەن، جۇرەك قىزمەتى السىرەگەن ادامداردا جۇرەك قىزمەتى سيپاتىندىق اۋرۋلار جۇرەك قىزمەتىنىڭ رولىن تومەندەتەدى، بۇعان قوسا، بۇيرەك قىزمەتىنىڭ السىرەۋى سىندى اۋرۋ بەلگىسى دە قوسارلانا جۇرەدى. ناۋقاس دەنەسىنىڭ سۋدى ىعىستىرۋ رولى تومەندەيدى، سۋ ىشۋگە ءمان بەرۋ جۇرەك قالجىراۋ ناۋقاسىنا شالدىققاندار ەرەكشە كوڭىل بولەتىن ىسكە اينالادى. ەگەر سۋدى مول ۇرتتاپ، كوپ ىشەتىن بولسا، سۋداعى ناتريدىڭ جينالۋى، جۇرەك كوتەرىمدىلىگىنىڭ ارتۋى قاتارلىلاردى وڭاي قالىپتاستىرىپ، اۋرۋدى اسقىندىرادى.
مۇنان سىرت، دەنە ارەكەتىمەن شۇعىلداناتىندار مەن دەنە ەڭبەگىمەن شۇعىلداناتىندار جونىنەن ايتقاندا، ارەكەتتەنگەن سوڭ، سۋعا دەگەن قاجەتسىنۋ مولشەرى ەكى ەسە ارتادى، وسى كەزدە سۋدى اسىعىس، كوپ جۇتۋ ءتىپتى دە قاتەرلى. ۇيتكەنى، ادام دەنەسى تەرلەگەن سوڭ، كوپ مولشەردەگى سۋ قۇرامى مەن ەلەكتروليت جويىلادى، سۋدى كوپ جۇتۋ قان قۇرامىنداعى ەلەكتروليتتىڭ مولشەرىن وڭاي سيرەتىپ، كلەتكالارداعى ەلەكتروليتتىڭ قويۋلىق دارەجەسىن جوعارىلاتادى، سۋ قۇرامى كلەتكالارعا سىڭگەندە، «سۋدان ۋلانۋ» جاعدايى تۋىلىپ، بۇلشىق ەتتىڭ ءتۇيىلۋى، جۇرەگى اينۋ، قوبالجۋ، ەسى اۋىسۋ جانە باسى اينالۋ قاتارلى اۋرۋ بەلگىلەرى بايقالادى، بۇيرەك، باۋىر جانە جۇرەك قاتارلى ورگانداردىڭ قىزمەتىنە ءتيىمسىز بولىپ، اۋىر بولعاندا كەنەتتەن ەسىنەن تانۋى مۇمكىن.
سۋدى ورىندى ءىشۋ جونىندەگى ساۋات
1. ازدان ۇرتتاپ، كوپ رەت ءىشۋ. سۋ — تىرشىلىك قاينارى، ادام دەنەسىندەگى ءاربىر كلەتكا سۋ قۇرامى ارقىلى جاسايدى. «جۇڭگو تۇرعىندارىنىڭ ازىقتانۋ باعدارناماسىندا» ساۋ دەنەلى ەرەسەكتەردىڭ سۋ ءىشۋ مولشەرى كۇنىنە 1500 ~ 1700 ميلليليتر بولۋى كەرەك دەپ ۇسىنىس بەرىلگەن، سۋ ىشپەۋ نەمەسە سۋدى وتە از ءىشۋ قاندى وڭاي قويىلتىپ، جۇرەك ەتىنىڭ ولەتتەنۋىن تۋدىرادى. جۇرەك قىزمەتى كەمەلدى بولماعان ادامدار سۋدى ءارى تەز، ءارى كوپ جۇتسا، جۇرەكتىڭ اۋىرتپالىعىن وڭاي ارتتىرىپ، ناۋقاس جاعدايىن اۋىرلاستىرادى. سوندىقتان، كوپشىلىك كۇندەلىكتى تۇرمىستا سۋدى شولدەگەن كەزدە عانا ىشپەستەن، از مولشەردە كوپ رەت ءىشۋ ادەتىن قالىپتاستىرۋى، سۋ قۇرامىنىڭ قالىپتى قابىلدانۋىن قامتاماسىزداندىرۋى كەرەك. جۇرەك اۋرۋى بار ادامدار شيپاگەردەن كەڭەس الىپ، سۋ ءىشۋدىڭ ۇيلەسىمدى مولشەرىن بەلگىلەۋى، كۇندەلىكتى تۇرمىستا تۇزدىڭ، سۋدىڭ مولشەرىن قاتاڭ تەجەپ وتىرۋى كەرەك، وسىلاي ىستەگەندە جۇرەكتىڭ شانشۋى، جۇرەك ەتىنىڭ ولەتتەنۋى قاتارلى اۋرۋلاردان ساقتانۋ رولىن اتقارادى.
2. سۋدى از – ازدان، اقىرىن ءىشۋ كەرەك. سۋعا تۇسكەننەن كەيىن نەمەسە ارەكەتتەنگەننەن كەيىن، سۋ مولشەرىنىڭ جويىلۋ قارقىنى تەزدەيدى، مۇنداي كەزدە سۋدى از – ازدان، اقىرىن ءىشۋ ارقىلى سۋ قۇرامىن تولىقتاۋ قاجەت. كوپ مولشەردە تەرلەگەن سوڭ، ادام دەنەسىندەگى ءبىر ءبولىم تۇز قۇرامى دا جويىلادى، ۇيلەسىمدى مولشەردە شالاڭ تۇزدى سۋ ءىشۋ نەمەسە سپورتتىق سۋسىندىق ىشۋگە بولادى.
3. تاماقتان جارىم ساعات بۇرىن ءبىر ستاكان سۋ ءىشۋ. تاماقتان جارىم ساعات بۇرىن ۇيلەسىمدى مولشەردە سۋ ءىشۋ ارقىلى تاماقتانۋ مولشەرىن ءونىمدى تىزگىندەۋگە، زات الماسۋدى ىلگەرىلەتۋگە، ۋىتتى نارسەلەردىڭ قابىلدانۋىن ازايتۋعا، ءىش قاتۋدىڭ الدىن الۋعا، اسقازاننىڭ اس قورىتۋ رولىن جاقسارتۋعا بولادى.
