مەملەكەتتىك راديو – تەلەۆيزيا باس مەكەمەسى 11 – ايدىڭ 23 – كۇنى «ينتەرنەتتىك شوۋ تىكە تاراتىلىمدارىن جانە ەلەكتروندىق ساۋدا تىكە تاراتىلىمدارىن باسقارۋدى كۇشەيتۋ جونىندەگى ۇقتىرۋدى» جاريالاپ، ينتەرنەتتىك شوۋ تىكە تاراتىلىم تەكشەلەرىندە ينتەرنەتتىك جۇرگىزۋشىلەرگە جانە «سيلىق بەرەتىن» قولدانۋشىلارعا شىن اتى – ءجونى بويىنشا باسقارۋ ءتۇزىمىن اتقارۋدى تالاپ ەتتى، ول ءۇشىن شىن اتى – جونىمەن تىركەلۋ، ادام ءجۇزىن اۆتوماتتى تانۋ، اۆتوماتتى تەكسەرۋدەن وتكىزۋ قاتارلى شارالار قولدانىلىپ، شىن اتى – ءجونى بويىنشا تىزىمدەۋدىڭ شىنايى تياناقتاندىرىلۋىنا كەپىلدىك ەتىپ، ازامات جاسىنا تولماعان تۇتىنۋشىلاردىڭ «سيلىق بەرۋ» يقۋاتىن قولدانۋىنا شەكتەۋ سالادى.
ۇقتىرۋدا مىنالار تالاپ ەتىلگەن: ينتەرنەتتىك شوۋ تىكە تاراتىلىم تەكشەلەرى، ەلەكتروندىق ساۋدا تىكە تاراتىلىم تەكشەلەرى پارمەندى شارالاردى شىناي قولدانىپ، زاڭعا قايشىلىق جاسايتىن، ءمورالعا جات قىلىقتار ىستەيتىن ادامدارعا الەۋمەتتىك ورىندا ەكران ارقىلى سوزگە شىعا الاتىن وراي بەرمەۋى كەرەك، بايلىعىن كورسەتىپ، اقشا قۇمارلىقتى دارىپتەۋ، دورەكى، انايى مازمۇندار جاريالاۋ سياقتى ارەكەتتەردىڭ تىكە تاراتىلىم سالاسىندا تامىر تارتۋىنان، وركەن جايۋىنان، سوتسياليستىك قۇن كوزقاراسىنا سوققى بولىپ، ينتەرنەتتىك دىبىس – كەسكىن ەكولوگياسىن لاستاۋدان ساقتانۋ كەرەك.
ۇقتىرۋدا مىنالار تالاپ ەتىلگەن: ينتەرنەتتىك تىكە تاراتىلىم تەكشەلەرى تىكە تاراتىلىم باعدارلامالارىنا مازمۇن جانە سايكەستى جۇرگىزۋشىلەر بويىنشا بەلگى قويىپ، تۇرگە ءبولىپ باسقارۋى كەرەك، «مۋزيكا»، «ءبي»، «دەنە شىنىقتىرۋ»، «ويىن»، «ساياحات»، «ءدامدى تاعام»، «تۇرمىستىق قىزمەت وتەۋ» قاتارلى تۇرلەرگە ءبولىپ، بەلگى قويۋى كەرەك. ءتۇرلى مازمۇندارداعى تىكە تاراتىلىم شوۋ باعدارلامالارىنىڭ ەرەكشەلىگىنە ساي، ۇزدىكتەرىن سۇيەمەلدەپ، ناشارلارىن جازالاۋ سىندى باسقارۋ شارالارىن باعىتتامالى تۇردە زەرتتەۋ – اتقارۋ كەرەك.
ۇقتىرۋدا مىنالار اتاپ كورسەتىلگەن: كوپ رەت ماسەلە بايقالعان تىكە تاراتىلىم بولمەلەرى مەن جۇرگىزۋشىلەر جونىنەن، ارنايى كورسەتۋدى توقتاتۋ، ۋاقىتىن شەكتەۋ، قاتارداعى رەتىن تومەندەتۋ، مەرزىمدى ۋاقىت ىشىندە وزگەرتۋ - رەتكە سالۋ قاتارلى ءبىرجاقتىلى ەتۋ شارالارىن اتقارۋ قاجەت. ماسەلەنىڭ سيپاتى اۋىر بولىپ، قايتا – قايتا ەسكەرتسە دە وزگەرتپەگەن بولسا، تىكە تاراتىلىم بولمەسىن جابۋ، قاتىستى جۇرگىزۋشىنى قارا تىزىمدىككە ەنگىزۋ ءارى راديو – تەلەۆيزيا باسقارۋ تاراۋلارىنا مالىمدەۋى كەرەك، ولاردىڭ اتتارىن وزگەرتۋ ارقىلى نەمەسە باسقا تەكشەنى اۋىستىرۋ ارقىلى تاعى دا تىكە تاراتىلىم بولمەلەرىن اشىپ الۋىنا رۇقسات بەرمەۋ كەرەك.
ۇقتىرۋدا مىنالار تالاپ ەتىلگەن: تىكە تاراتىلىم تەكشەلەرى قولدانۋشىلاردىڭ ءار رەتكى، ءار كۇنگى، ءار ايداعى ەڭ جوعارى «سيلىق بەرۋ» سوماسىنا شەكتەۋ سالۋى قاجەت؛ تەكشەلەر قولدانۋشىلار بەرگەن «سيلىقتاردى» جۇرگىزۋشىلەردىڭ ەسەپ نومىرىنە دەرەۋ كىرگىزبەۋى، جۇرگىزۋشىلەر زاڭعا قايشى ارەكەت ىستەيتىن بولسا، «سيلىق اقشالاردى» ونى بەرگەن قولدانۋشىلاردىڭ وزدەرىنە قايتارىپ بەرۋى كەرەك.
http://kazakh.people.com.cn/306611/15830648.html
