[دەلو] 2017 – جىلى 11 – ايدان 2019 – جىلى 5 – ايعا دەيىن، ياڭ X رۇي بىرەۋمەن بىرگە سەرىكتەستىك قۇرىپ، ينتەرنەتتىك تىكە تاراتۋ تەكشەلەرىندە تىكە تاراتۋ بولمەسىن اشىپ، ليۋ X شيڭ، سۇن X لين قاتارلىلاردى تىكە تاراتىلىم جۇرگىزۋشى بويجەتكەن قىزمەتىنە، چىڭ X نان قاتارلىلاردى كاسىپتىك جۇمىس ءبىتىرۋشى قىزمەتىنە قابىلداعان. ولار ءوزارا سەلبەسىپ جانە سايكەسىپ، ۇيلەنۋگە جانە دوستاسۋعا تانىستىرۋ تورابى قاتارلىلار ارقىلى جاۋ X قاتارلى زياندالۋشىلارمەن تانىسىپ، ولاردى ۋيچاتتا دوستار قاتارىنا قوسقان سوڭ، زياندالۋشىلاردى جاعىمدى سوزدەرمەن ارباپ، جوعارىدا اتالعان ينتەرنەتتەگى تىكە تاراتىلىم تەكشەسىنە مۇشە بولۋ ارقىلى تىكە تاراتىلىم تەكشەسىنەن جۇرگىزۋشى بويجەتكەندەردىڭ جۇرگىزگەن قويىلىمدارىن كورۋگە جەتەلەگەن.
وسىدان سوڭ، جۇمىس بىتىرۋشىلەر جۇرگىزۋشى بويجەتكەندەردىڭ ماحاببات حيكايالارى، باسىنان وتكەن كەشىرمەلەرى قاتارلىلاردى ويدان قيىستىرىپ، زياندالۋشىلارمەن اڭگىمەلەستىرگەن، وسى ارقىلى زياندالۋشىلاردىڭ تىلەكتەستىگىنە يە بولعان. جوعارىداعى ءبىرقىدىرۋ ارەكەتتەر ارقىلى جۇرگىزۋشى بويجەتكەندەر مەن زياندالۋشىلار اراسىندا جالعان ماحاببات قارىم – قاتىناسىن تۇراقتاندىرعان.
وسىدان سوڭ، جۇرگىزۋشى بويجەتكەندەر «تەكشە تاپسىرعان جۇمىس مىندەتىن ورىنداعاندا عانا ۇستەمە ەڭبەكاقىنى الۋعا بولادى»، «تەكشەمەن توقتامدى ءۇزۋ ءۇشىن قاراجات قاجەت» دەگەن سياقتى سىلتاۋلارمەن ىلگەرىندى – كەيىندى جاۋ X قاتارلى زياندالۋشى 4 ادامدى الداپ، تىكە تاراتىلىم تەكشەسىندەگى جۇرگىزۋشىگە «سيلىق بەرۋ» نەمەسە تىكەلەي اقشا اۋدارۋ تاسىلدەرىمەن ولاردان جيىنى 172 مىڭ يۋاننان استام قاراجاتتى الداپ العان.
2019 – جىلى 9 – ايدىڭ 3 – كۇنى، قوعام حاۋىپسىزدىگى ورگاندارى ياڭ X رۇي قاتارلى 11 ادامدى الدامكوستىك قىلمىس كۇمانىمەن پروكۋراتۋرا ورگاندارىنىڭ تەكسەرىپ ايىپتاۋ كوتەرۋىنە وتكىزىپ بەرگەن. 2019 – جىلى 12 – ايدىڭ 30 – كۇنى، سوت مەكەمەسى ءبىرىنشى سوت ۇكىمىن شىعارىپ، ياڭ X رۇي، ليۋ X شيڭ، سۇن X لين، چىڭ X نان قاتارلى 11 ادامدى 4 اي قاماۋعا الۋدان تارتىپ، 4 جىلدىق مەرزىمدى قاماق جازاسىن بەرۋگە دەيىنگى ءتۇرلى جازالارعا ۇكىم ەتكەن ءارى اقشالاي ايىپ سالعان.
[زاڭ ۇگىتى] ينتەرنەتتىك تىكە تاراتىلىمدار قولدانۋشىلاردى وزدەرى قاتىناسىپ وتىرعانداي، وزگەلەرمەن قارىم – قاتىناس جاساپ وتىرعانداي جاقسى اسەرگە بولەۋمەن بىرگە، زاڭعا قايشى قىلمىستىق ارەكەتتەر مەن قوعامداعى ناشار ستيلدەردى دە وڭاي ورشىتەدى. قالىڭ ينتەرنەت قولدانۋشىلار جونىنەن ايتقاندا، شەشۋشى ءتۇيىن — تىكە تاراتىلىمعا قاتىناسقاندا نيەتى دۇرىس تا اقاۋسىز بولۋى، «جوققا قۇمارتۋ»، «سۇلۋلارعا سۇقتانۋ» سىندى بوتەن نيەتپەن قاتىناسپاۋى كەرەك، ايتپەگەندە، زاڭعا قايشى قىلمىستىق ەلەمەنتتەردىڭ تاپتەشتەپ ورنالاستىرعان «تۇزاعىنا» ءتۇسىپ قالۋىڭىز مۇمكىن.
قىلمىستىق ەلەمەنتتەر ينتەرنەتتە جالعان سالاۋاتپەن، تاراتىلىم جۇرگىزۋشى دەگەن اتپەن، ءتاتتى سوزدەرمەن ارباپ، جالعان ماحابباتتاسىپ، ينتەرنەت ارقىلى جانە ينتەرنەتتەن تىس تاسىلدەردى ۇشتاستىرۋ ارقىلى زياندالۋشىلارعا قاتە تۇسىنىك بەرىپ، ولاردىڭ مال – مۇلكىن الداپ السا، ءادىليا ورگاندارى ولاردى زاڭ بويىنشا الدامكوستىك قىلمىسىن قالىپتاستىردى دەپ تانيدى.
سونىمەن بىرگە، تەكشەلەردى باقىلاۋ – باسقارۋ، جونگە سالۋدى كۇشەيتۋ، تىكە تاراتىلىم سالاسىنىڭ تاماشا ءتارتىبىن قورعاۋ كەرەك. ينتەرنەت تەكشەلەرى نەگىزگى تۇلعالىق جاۋاپكەرشىلىكتى شىنايى ارقالاپ، تىكە تاراتىلىم ارەكەتىنە ۇدايىلانعان تەكسەرۋ جانە تەحنيكالىق باقىلاۋ – مەڭگەرۋدى كۇشەيتىپ، تەكشەلەر اراسىندا ينفورماتسيانى ورتاق پايدالانۋدى كۇشەيتىپ، «قارا تىزىمدىككە» ەنگىزىلگەن جۇرگىزۋشىلەرگە قاتاڭ تۇردە بىرلەسكەن باسقارۋدى ورىستەتىپ، ولاردىڭ بەلگىلەمەگە قايشى تۇردە قايتادان تىكە تاراتىلىمعا شىعۋ جولدارىن تۇبەگەيلى بەكىتىپ، ينتەرنەتتىك تىكە تاراتىلىم كەڭىستىگىنىڭ ەكولوگياسىن پاكتەندىرۋ كەرەك.
http://kazakh.people.com.cn/15836595.html
