تاياۋدا اۆتونوميالى رايوندىق ءتارتىپ تەكسەرۋ كوميتەتى، باقىلاۋ - تەكسەرۋ كوميتەتى ورتالىقتىڭ 8 ءتۇرلى بەلگىلەمەسىنىڭ رۋحىنا قايشىلىق جاساپ، تارتۋ - تارالعى، اقشا قابىلداۋعا، ۇسىنۋعا قاتىستى 6 تيپتىك ماسەلەنى اشىق جاريالادى. وسى 6 تيپتىك ماسەلە مىنالار:
1. توقسۇن اۋداندىق مال شارۋاشىلىعى، مال شيپاگەرلىگى مەكەمەسى پارتيا باس ياچەيكاسىنىڭ بۇرىنعى مۇشەسى، بۇرىنعى مەكەمە باستىعى شىكىرام ءناجىمنىڭ بەلگىلەمەگە قايشىلىق جاساپ تارتۋ - تارالعى، اقشا قابىلداۋى سياقتى ماسەلەلەرى. 2016 - جىلى 1 - ايدان 9 - ايعا دەيىن، شىكىرام ءناجىم تالاي رەت باسقارۋ، قىزمەت وتەۋ وبيەكتىلەرىنىڭ تامىر - تانىس بولۋ ءۇشىن بەرگەن تارتۋ - تارالعىسىن، اقشاسىن قابىلداعان، مۇنى اقشاعا شاققاندا، جالپى 29 مىڭ 200 يۋان بولعان؛ جەكە كولىگىن اشەكەيلەۋ، كۇتىمدەۋ قاراجاتتارى ءۇشىن جۇمسالعان جالپى 29 مىڭ 800 يۋان اقشانى ۇكىمەت ەسەبىنەن كوتەرتكەن. بۇدان سىرت، شىكىرام ءناجىمنىڭ باسقا دا تارتىپكە قايشىلىق جاساۋ ماسەلەلەرى ساقتالعان. 2018 - جىلى 8 - ايدا شىكىرام ناجىمگە پارتيادان شىعارۋ، اكىمشىلىك مىندەتىنەن قالدىرۋ جازاسى بەرىلدى.
2. بۇراتالا قالالىق 7 - ورتا مەكتەپ پارتيا ياچەيكاسىنىڭ بۇرىنعى شۋجيى، مەكتەپتىڭ بۇرىنعى ورىنباسار باستىعى امەت ازەزدىڭ بەلگىلەمەگە قايشىلىق جاساپ اقشا قابىلداۋ ماسەلەسى. 2017 - جىلى 2 - ايدان 7 - ايعا دەيىن، امەت ازەز قىزمەت قولايلىلىعىنان پايدالانىپ، تالاي رەت باسقارۋ، قىزمەت وتەۋ وبيەكتىلەرى ۇسىنعان جالپى 7000 يۋان اقشانى قابىلداعان. بۇدان سىرت، امەت ازەزدىڭ باسقا دا تارتىپكە قايشىلىق جاساۋ ماسەلەلەرى ساقتالعان. 2018 - جىلى 7 - ايدا امەت ازەزگە پارتيادا قالدىرىپ 2 جىل بايقاپ كورۋ، قىزمەت ورنى دارەجەسىن تومەندەتۋ جازاسى بەرىلدى.
3. قىزىلسۋ قىرعىز اۆتونوميالى وبلىستىق ەكونوميكا جانە ينفورماتسيالاندىرۋ كوميتەتى پارتيا باسشىلىق گرۋپپاسىنىڭ مۇشەسى، ورىنباسار مەڭگەرۋشىسى شۇي يۇننىڭ بەلگىلەمەگە قايشىلىق جاساپ تارتۋ - تارالعى، اقشا قابىلداۋ ماسەلەسى. 2013 - جىلدان 2015 - جىلى كوكتەم مەرەكەسىنە دەيىن، شۇي يۇن باسقارۋ، قىزمەت وتەۋ وبيەكتىلەرى ۇسىنعان زات ساتىپ الۋ كارتچكاسى، تارتۋ - تارالعىلاردان، اقشاعا شاققاندا، جالپى 5000 يۋان قابىلداعان. بۇدان سىرت، شۇي يۇننىڭ باسقا دا تارتىپكە قايشىلىق جاساۋ ماسەلەلەرى ساقتالعان. 2018 - جىلى 7 - ايدا شۇي يۇنگە پارتيا ىشىندە قاتاڭ ەسكەرتۋ بەرىلىپ، اكىمشىلىك اۋىر ايىپ جازىلدى.
4. كۇنەس اۋدانى زەكتى قالاشىعى پارتكومىنىڭ بۇرىنعى شۋجيى جۋ جىۋيدىڭ بەلگىلەمەگە قايشىلىق جاساپ تارتۋ - تارالعى قابىلداۋ ماسەلەسى. 2018 - جىلى 3 - ايدان 6 - ايعا دەيىن، جۋ جىۋي قىزمەت قولايلىلىعىنان پايدالانىپ باسقارۋ، قىزمەت وتەۋ وبيەكتىلەرىنەن بەلگىلەمەگە قايشىلىق جاساپ جوعارى سورتتى اق اراق، تەمەكى، شاي جانە ماي قۇيۋ كارتچكاسى سياقتىلاردان اقشاعا شاققاندا، جالپى 27 مىڭ 700 يۋان قابىلداعان. 2018 - جىلى 7 - ايدا جۋ جىۋيعا پارتيادا قالدىرىپ ءبىر جىل بايقاپ كورۋ، اكىمشىلىك مىندەتىنەن قالدىرۋ جازاسى بەرىلدى.
5. اۆتونوميالى رايوندىق دەنساۋلىق ساقتاۋ، جوسپارلى تۋىت كوميتەتى جوسپارلى تۋىت ءدارى - اسپاپتارىن باسقارۋ ورتالىعى پارتيا ياچەيكاسىنىڭ بۇرىنعى ورىنباسار شۋجيى، بۇرىنعى مەڭگەرۋشىسى كاڭ يۇڭفۋدىڭ بەلگىلەمەگە قايشىلىق جاساپ تارتۋ - تارالعى ساتىپ الۋ ماسەلەسى. 2017 - جىلى 7 - ايدا كاڭ يۇڭفۋ قىزمەت بايلانىسىنا قولايلى بولۋدى سىلتاۋ ەتىپ، 300 مىڭ يۋاننان استام كاسىپتىك قاراجاتتى باسقاعا جۇمساپ، قوراپتالعان تىرناق قايشىسى، ۇستەل شامى، جاستىق سياقتى بۇيىمداردى ساتىپ الىپ، ونى تارتۋ - تارالعى رەتىندە ۇسىنۋدى جوسپارلاعان. بۇدان سىرت، كاڭ يۇڭفۋدىڭ باسقا دا تارتىپكە قايشىلىق جاساۋ ماسەلەلەرى ساقتالعان. 2018 - جىلى 6 - ايدا كاڭ يۇڭفۋعا پارتيا ىشىندەگى مىندەتىنەن قالدىرۋ، اكىمشىلىك مىندەتىنەن قالدىرۋ جازاسى بەرىلدى.
6. شونجى اۋداندىق ەكونوميكا جانە ينفورماتسيالاندىرۋ كوميتەتى پارتكومىنىڭ بۇرىنعى ورىنباسار شۋجيى، بۇرىنعى مەڭگەرۋشىسى چىن يۇڭجۇڭنىڭ بەلگىلەمەگە قايشىلىق جاساپ تارتۋ - تارالعى قابىلداۋ ماسەلەسى. 2014 - جىلى جۇڭچيۋ مەرەكەسى قارساڭىندا، چىن يۇڭجۇڭ باسقارۋ، قىزمەت وتەۋ وبيەكتىلەرىنەن جوعارى سورتتى اق اراق، اي توقاش سياقتى تارتۋ - تارالعىلارىنان، اقشاعا شاققاندا، جالپى 5900 يۋان قابىلداعان. 2018 - جىلى 7 - ايدا چىن يۇڭجۇڭعا پارتيا ىشىندە قاتاڭ ەسكەرتۋ جازاسى بەرىلدى.
بەلگىلەمەگە قايشىلىق جاساپ تارتۋ - تارالعى، اقشا قابىلداۋ، ۇسىنۋ ماسەلەسى «كىشى - گىرىم ىستەي» كورىنگەنىمەن، ناعىندا ونىڭ زاردابى اۋىر. جوعارىداعى 6 تيپتىك ماسەلەدە كەيبىرەۋى تالاي رەت زات ساتىپ الۋ كارتچكاسىن نەمەسە ناق اقشا قابىلداپ، سوماسى نەشە 10 مىڭ يۋانعا جەتكەن، كەيبىرەۋى جەرگىلىكتى ەرەكشە ونىمدەردى عانا العانىمەن، قۇنى جوعارى بولماعانىمەن، ءبىراق «ساۋساقتىڭ ۇلكەندىگىندەي قۋىستان جەل وتەدى»، سوماسىنىڭ از - كوپتىگىنە قاراماستان، بارلىعى پاكتىك تارتىبىنە قايشى، ۇكىمەت قىزمەتىن ادىلدىكپەن اتقارۋعا ىقپالىن تيگىزەدى، ۇكىمەت پەن ساۋدانىڭ ەتەنە، پاك قاتىناسىنا نۇقسان كەلتىرەدى، پارتيا ستيلىنە، ۇكىمەت ستيلىنە داق سالادى، ەگەر ونى ەركىنە جىبەرسەك، ساياسي ەكولوگيانى ءبۇلدىرىپ، قوعامدىق سالتتى بىلعاپ، پارتيا مەن بۇقارانىڭ، كادرلار مەن بۇقارانىڭ قاتىناسىنا اۋىر دارەجەدە ىرتكى سالىپ، پارتيانىڭ بيلىك جۇرگىزۋىنىڭ ساياسي نەگىزىنە زيان كەلتىرەدى.
جۇڭچيۋ مەرەكەسى، مەملەكەت مەرەكەسى تاياپ قالدى، بۇكىل رايونىمىزداعى ءار دارەجەلى پارتيا ۇيىمدارى مەن ءتارتىپ تەكسەرۋ، باقىلاۋ - تەكسەرۋ ورگاندارى شىنايى باسقارۋدى، قاتاڭ باسقارۋدى پارتيالى كادرلارعا دەگەن ەڭ ۇلكەن «يگىلىك» ساناپ، ءوز رايونىنىڭ، ءوز تاراۋىنىڭ، ءوز ورنىنىڭ ستيل قۇرىلىسىنىڭ ءىس جۇزىندىك جاعدايىن تياناق ەتىپ، «شەشۋشى ازشىلىقتى» نازاردان شىعارماي، بەلگىلەمەگە قايشىلىق جاساپ تارتۋ - تارالعى، اقشا قابىلداۋ، ۇسىنۋ، بەتالدى قوسىمشا قاراجات، ۇستەمە قاراجات تاراتۋ، بەلگىلەمەگە قايشىلىق جاساپ ۇكىمەت اقشاسىمەن ءىشىپ - جەۋ، ۇكىمەت اقشاسىمەن زات ساتىپ الۋ، ۇكىمەت اقشاسىمەن ساياحاتتاۋ سياقتى وڭاي تۋىلاتىن، كوپ تۋىلاتىن ماسەلەلەرگە قاداعالاي نازار اۋدارىپ، الدىن الا ورنالاستىرۋ جاساپ، اشىق نەمەسە جاسىرىن تەكسەرىپ، باقىلاۋ ارناسىن كەڭەيتىپ، باقىلاۋ - تەكسەرۋدى ۇزدىكسىز ورىستەتۋ كەرەك. اتىن اتاپ، ءتۇسىن تۇستەپ اشىق حابارلاندىرۋ شىعارىپ جاريالاۋعا تاباندى بولىپ، تارتىپكە قايشىلىق جاساعانداردى، ءسوز جوق، قۋزاۋدىڭ، ءتارتىپتى، ءسوز جوق، قاتاڭ اتقارۋدىڭ، ىشكەرىلەگەن سايىن قاتاڭ بولۋدىڭ كۇشتى سيگنالىن ۇزدىكسىز تاراتىپ، قالىڭ پارتيالى كادرلاردىڭ يدەيانى سانالى تۇردە تازارتىپ، جالپى مەن جەكەنىڭ شەكاراسىن قاتاڭ ساقتاپ، كوڭىلگە قاراۋ مەن زاڭ - ءتارتىپتىڭ شەكاراسىن ايىرىپ، تومەنگى شەككە جۋىماي، قىزىل سىزىقتان اتتاماي، ستيلدى سانالى تۇردە جاقسارتىپ، تاماشا وبراز سومداۋىن جەبەۋ كەرەك.
